Фарғонада аёл киши ўзганинг уйига ғайриқонуний равишда кириб, уйдан катта миқдорда пулларни ўғирлаб кетди, дея хабар қилмоқда ИИВ.
Маълум қилинишича, 1 март куни «Солижонобод» МФЙ ҳудудида яшовчи А.А. ИИБга мурожаат қилиб, унда 2020 йилнинг февраль ойида номаълум шахс яшаш хонадонига ғайриқонуний равишда кириб, хонадон меҳмонхонасидаги сандиқ ичидан 500 АҚШ доллари, 5000 Россия рубли ва 6 750 000 сўм пулларини яширин равишда талон-торож қилиб, ҳодиса жойидан яширинганлигини маълум қилган.
Мазкур ҳолат юзасидан Қўштепа тумани ИИБ ҳузуридаги тергов бўлими томонидан Жиноят кодексининг 169-моддаси 2-қисми «г» банди (уй-жойга кириб содир этилган ўғрилик) билан жиноят иши қўзғатилган.
Олиб борилган тезкор-қидирув тадбирлари давомида мазкур жиноятни Қ.С. исмли аёл содир этганлиги аниқланиб, у томонидан жиноий йўл билан қўлга киритган пуллар ҳисобидан сотиб олинган 6 дона бахмал якандоз кўрпачалари далилий ашё тариқасида олинган, ҳозирда тергов ҳаракатлари олиб борилмоқда.
Қонунчиликка асосан Жиноят кодексининг 169-моддаси 2-қисмида кўрсатилган жиноятни содир этган шахс беш йилгача озодликдан маҳрум қилиш билан жазоланиши мумкин.
Бундан аввал Самарқандда «романтик оқшом» учун чақирилган қизлар ўсмирнинг уйини тўнаб кетгани, Наманганда ўз ишхонасининг 15 млн сўмлик дарвозасини ўғирлаган қоровул қўлга олингани ҳамда Самарқандда ижарачи йигит ўзи яшаб келган хонадон эгасининг машинасини олиб қочиб, ЙТҲга учрагани ҳақида хабар берилганди.
Изоҳ (0)