Тошкент шаҳрининг Яккасарой тумани Боғибўстон кўчасида бир кишининг ўлими билан якунланган ЙТҲ юз берди. Бу ҳақда пойтахт ИИББ матбуот хизмати хабар берди.
5 март куни, тахминан, соат 09:30 да 22 ёшли Д.Р. Mercedes-Benz’ни бошқариб кетаётганда пиёдалар 41 ёшли Г.Д. ва 58 ёшли Х.М.ни уриб юборган. Сўнг 33 ёшли И.К. бошқарувидаги Cobalt’га тўқнашган.
Оқибатда 58 ёшли Х.М. олган жароҳатлари туфайли воқеа жойида ҳалок бўлган, 41 ёшли Г.Д.га бадан шикастлари етган.
Ҳолат юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш) бўйича жиноий иш қўзғатилган.
ЙТҲ сабаблари аниқланмоқда.
Аввалроқ Ўзбекистонда 2020 йилда йўл-транспорт ҳодисалари оқибатида жами 1962 киши ҳалок бўлгани, йўл ҳаракати хавфсизлигига қарши содир этилган жиноятлар учун жазони кучайтириш таклиф этилаётгани ҳақида хабар берилган эди.
Изоҳ (0)