Ўзбекистонда монополияга қарши янгича назорат тизими жорий этилиши ҳақида хабар берилган эди. Монополияга қарши курашиш қўмитаси матбуот хизмати бу борада 2 март куни «Монополияга қарши комплаенс тизимини жорий этиш чора-тадбирлари тўғрисида»ги ҳукумат қарори қабул қилинганини маълум қилди.
Монополияга қарши комплаенс тизими — давлат бошқаруви органлари, маҳаллий ҳокимият органлари ва хўжалик юритувчи субъектларда рақобат тўғрисидаги қонунчилик талабларига мувофиқликни таъминлаш ички тизимидир. Бундай тизимни 2021 йилнинг 1 январидан жорий этиш Президентнинг 2020 йил 6 июлдаги «Рақобат муҳитини янада ривожлантириш ва иқтисодиётдаги давлат иштирокини қисқартириш бўйича қўшимча чора-тадбирлар тўғрисида»ги фармонида кўзда тутилганди.
Монополияга қарши комплаенс тизими икки босқичда татбиқ этилади:
2021 йил 1 январдан — тажриба тариқасида давлат бошқаруви органлари, маҳаллий ижро этувчи ҳокимият органлари ҳамда Президентнинг 2020 йил 6 июлдаги фармони билан тасдиқланган рўйхатга киритилган давлат иштирокидаги корхоналарда: Uzbekistan Airways, «Кварц» «Асака» акциядорлик тижорат банки, UzAuto Motors, «Ўзтрансгаз» «Навоийазот», «Иссиқлик электр станциялари», «Ўзбекистон миллий электр тармоқлари», «Қизилқумцемент».
2022 йил 1 январдан — табиий монополия субъектлари, товар ёки молия бозорида устун мавқега эга хўжалик юритувчи субъектлар, шунингдек, охирги 3 йилда товар сотишдан олинган жами тушумнинг ўртача йиллик миқдори 30 миллиард сўмдан ошадиган корпоратив буюртмачиларда.
Қарор билан монополияга қарши комплаенс тизимини жорий этиш тартиби тўғрисидаги низом ва тегишли «йўл харита» тасдиқланган.
Қўмита хабарида айтилишича, монополияга қарши комплаенс тизимини жорий этиш орқали қуйидаги натижаларга эришилиши кутилмоқда:
- рақобат қонунчилиги талаблари бузилиши хавфининг олдини олиш, ҳақиқий бизнес юритишнинг корпоратив стандартларини жорий этишга оид самарали тизим ташкил этилиши;
- бозор субъектининг ишбилармонлик обрўси ва рақобатга путур етказадиган ҳаракатлар (ҳаракатсизликлар)нинг олдини олиш механизмлари асосида рақобатни ҳимоя қилишнинг янги модели шаклланиши;
- рақобат қонунчилиги талаблари бузилиши хавфларининг олдини олиш ва қонунчилик бузилиши ҳолатларини бартараф этиш ҳамда кейинги давр мобайнида уларга йўл қўймаслик;
- рақобат қонунчилигига зид ҳаракатлар (ҳаракатсизликлар) сонининг қисқариши.
Комплаенс тизимини жорий этиш ишлари илк марта 2019 йилнинг ноябрида Бош прокуратура томонидан «Ўзбекнефтгаз» ва «Ўзкимёсаноат» компанияларида бошланган. Монополияга қарши курашиш қўмитаси ишлаб чиққан ҳукумат қарори лойиҳасида эса 2021 йил 1 январдан бошлаб тажриба (синов) тариқасида давлат иштирокидаги айрим корхоналарда монополияга қарши комплаенс тизимини жорий этиш мажбурий ҳисобланиши белгиланган эди. Кейинроқ 2020 йил 1 октябрга қадар нефть-газ тармоғидаги барча корхоналарда коррупцияга қарши комплаенс-назорат тизими жорий этилиши ҳақида хабар берилган.
Изоҳ (0)