АҚШ президенти Жо Байден 2014 йилда Қрим ва Украинадаги вазият муносабати билан Россияга қарши киритилган санкциялар муддатини узайтирди, деб ёзади «РБК» Федерал реестр томонидан эълон қилинган тегишли ҳужжатга таяниб.

Фото: Reuters

Бунда гап 2014 йил 6 март куни Барак Обама томонидан имзоланган президент фармони ҳақида бормоқда, у Россия ва унинг айрим фуқароларига нисбатан фавқулодда иқтисодий чекловлар жорий қилади. Кейинчалик Обама, сўнг эса АҚШнинг 45-президенти Дональд Трамп Қримнинг қўшиб олиниши ҳамда Донбассдаги воқеалар туфайли Россияга қарши санкцияларни бир неча марта кенгайтирган ва уларнинг муддатини узайтирган.

Ҳужжатга илова қилинган изоҳда Байден тушунтиришича, Россиянинг хатти-ҳаракатлари «АҚШ миллий хавфсизлиги ва ташқи сиёсати манфаатларига хавф солишда давом этмоқда», шу сабабли у санкция режими яна бир йилга узайтирилиши керак, деган қарорга келган.

2014 йил мартида Обама томонидан имзоланган биринчи фармонда фавқулодда ҳолат режими «Украинада демократик жараёнларни қўпоришга, унинг суверенитети ва ҳудудий яхлитлигини бузишга урнишлар юзасидан» киритилгани айтилган эди.

Ўша йилнинг ўзида АҚШ яна уч марта Қрим туфайли Россияга қарши чоралар қабул қилди. Тегишли фармонларда «Қримнинг Россия томонидан босиб олиниши» ҳақида айтилади. Яна бир фармойиш билан 2018 йил сентябрида АҚШ Россияга қарши санкцияларни кенгайтирди.

Қрим ва Севастопол 2014 йил 16 март куни бўлиб ўтган референдум якунларига кўра Россия таркибига кирди. АҚШ, Украина ва Евроиттифоқ ярим оролни Россия ҳудуди деб тан олмади, Киев уни «вақтинчалик босиб олинган» деб ҳисоблайди.

2021 йил 2 март куни эса Евроиттифоқ ва АҚШ сиёсатчи Алексей Навальний билан боғлиқ вазият туфайли россиялик амалдорларга қарши санкциялар киритди.

АҚШ Давлат департаменти маълум қилишича, Американинг кимёвий ва биологик қурол устидан назорат ҳақидаги қонун (CBW Act)га мувофиқ, Россияни Навальний заҳарланиши туфайли санкцияларнинг иккинчи раунди кутмоқда.

Агар Россия ўз кимёвий қуроли ҳақида декларация қилса ва уни йўқ қилса, санкцияларнинг иккинчи раундидан қутулиб қолиши мумкин, дея қўшимча қилишди Давлат департаментида.

Давлат департаменти вакилининг эслатишича, 2018 йилда Давлат разведка бошқармаси собиқ офицери Сергей Скрипалга асаб-фалажловчи таъсирга эга «Новичок» воситаси ёрдамида суиқасд уюштирилгач, АҚШ CБW қонуни бўйича Россияга қарши икки раундда санкциялар киритган эди. Москва ўшанда 1991 йилги Америка қонунлари талабларига жавоб қайтармаган эди.

Россия 2018 йилдаёқ кимёвий қурол захираларининг барчаси йўқ қилингани ҳақида ҳисобот берган. Аммо АҚШ ҳукумати фикрича, Москва кимёвий қурол ишлаб чиқиш бўйича махфий дастурни олиб бормоқда ва унинг захираларини сақлаб қўймоқда.