AQSh Rossiyaga Qrim sabab kiritilgan sanksiyalar muddatini bir yilga uzaytirdi va Navalniy tufayli sanksiyalarning ikkinchi raundi haqida ogohlantirdi

AQSh prezidenti Jo Bayden 2014-yilda Qrim va Ukrainadagi vaziyat munosabati bilan Rossiyaga qarshi kiritilgan sanksiyalar muddatini uzaytirdi, deb yozadi “RBK” Federal reyestr tomonidan e’lon qilingan tegishli hujjatga tayanib.

Bunda gap 2014-yil 6-mart kuni Barak Obama tomonidan imzolangan prezident farmoni haqida bormoqda, u Rossiya va uning ayrim fuqarolariga nisbatan favqulodda iqtisodiy cheklovlar joriy qiladi. Keyinchalik Obama, so‘ng esa AQShning 45-prezidenti Donald Tramp Qrimning qo‘shib olinishi hamda Donbassdagi voqealar tufayli Rossiyaga qarshi sanksiyalarni bir necha marta kengaytirgan va ularning muddatini uzaytirgan.

Hujjatga ilova qilingan izohda Bayden tushuntirishicha, Rossiyaning xatti-harakatlari “AQSh milliy xavfsizligi va tashqi siyosati manfaatlariga xavf solishda davom etmoqda”, shu sababli u sanksiya rejimi yana bir yilga uzaytirilishi kerak, degan qarorga kelgan.

2014-yil martida Obama tomonidan imzolangan birinchi farmonda favqulodda holat rejimi “Ukrainada demokratik jarayonlarni qo‘porishga, uning suvereniteti va hududiy yaxlitligini buzishga urnishlar yuzasidan” kiritilgani aytilgan edi.

O‘sha yilning o‘zida AQSh yana uch marta Qrim tufayli Rossiyaga qarshi choralar qabul qildi. Tegishli farmonlarda “Qrimning Rossiya tomonidan bosib olinishi” haqida aytiladi. Yana bir farmoyish bilan 2018-yil sentabrida AQSh Rossiyaga qarshi sanksiyalarni kengaytirdi.

Qrim va Sevastopol 2014-yil 16-mart kuni bo‘lib o‘tgan referendum yakunlariga ko‘ra Rossiya tarkibiga kirdi. AQSh, Ukraina va Yevroittifoq yarim orolni Rossiya hududi deb tan olmadi, Kiyev uni “vaqtinchalik bosib olingan” deb hisoblaydi.

2021-yil 2-mart kuni esa Yevroittifoq va AQSh siyosatchi Aleksey Navalniy bilan bog‘liq vaziyat tufayli rossiyalik amaldorlarga qarshi sanksiyalar kiritdi.

AQSh Davlat departamenti ma’lum qilishicha, Amerikaning kimyoviy va biologik qurol ustidan nazorat haqidagi qonun (CBW Act)ga muvofiq, Rossiyani Navalniy zaharlanishi tufayli sanksiyalarning ikkinchi raundi kutmoqda.

Agar Rossiya o‘z kimyoviy quroli haqida deklaratsiya qilsa va uni yo‘q qilsa, sanksiyalarning ikkinchi raundidan qutulib qolishi mumkin, deya qo‘shimcha qilishdi Davlat departamentida.

Davlat departamenti vakilining eslatishicha, 2018-yilda Davlat razvedka boshqarmasi sobiq ofitseri Sergey Skripalga asab-falajlovchi ta’sirga ega “Novichok” vositasi yordamida suiqasd uyushtirilgach, AQSh CBW qonuni bo‘yicha Rossiyaga qarshi ikki raundda sanksiyalar kiritgan edi. Moskva o‘shanda 1991-yilgi Amerika qonunlari talablariga javob qaytarmagan edi.

Rossiya 2018-yildayoq kimyoviy qurol zaxiralarining barchasi yo‘q qilingani haqida hisobot bergan. Ammo AQSh hukumati fikricha, Moskva kimyoviy qurol ishlab chiqish bo‘yicha maxfiy dasturni olib bormoqda va uning zaxiralarini saqlab qo‘ymoqda.