Қаришни секинлаштиради, мия фаолиятини яхшилайди: мурчнинг кўпчиликка номаълум хусусиятлари

Қора мурч дунёдаги энг машҳур зиравор ҳисобланади. «Зираворлар шоҳи» барча миллат ошхоналарида энг кераклиси бўлиб, фойдали хусусиятларга ҳам бой. Мазкур зираворни мунтазам истеъмол қилиш холестерин ва қондаги глюкоза миқдорини бошқаришга ёрдам беради. Мия фаолиятини яхшилаб, қаришнинг олдини олади.

Қора мурч таркибида юқори концентрациядаги антиоксидант пиперин мавжуд. Бу танани эркин радикалларнинг зарарлашидан ҳимоя қилади, яллиғланиш жараёнларининг ривожланишига тўсқинлик қилади. Эрта қариш жараёнини секинлаштиради ва ультрабинафша нурларидан ҳимоя қилади. Айтганча, пиперин бошқа табиий антиоксидант – куркуманинг таъсирини сезиларли даражада оширади. Шунинг учун зарчавали таомларга ҳамиша қора мурч қўшиш тавсия этилади.

Қора мурч кучли яллиғланишга қарши хусусиятга эга. Аммо яллиғланиш реакцияси ҳам организм учун муҳим. Яллиғланиш – саломатликка таҳдид солиши мумкин бўлган вирус, бактерия ва патогенлардан ҳимоя механизмидир. Аммо яллиғланиш сурункали ҳолатга келганда у энди ҳимоя эмас, жиддий муаммо ҳам ҳисобланади. Қора мурч таркибидаги фаол бирикмалар организмдаги ҳар бир ҳужайрани янги зарарланишдан ҳимоя қилиб, молекуляр даражада яллиғланиш билан курашади.

Унинг таркибидаги фаол моддалар қонда холестерин миқдорини назорат қилиш, қон томирларини тозалаш ва юрак-қон томир касалликларининг олдини олишга ёрдам беради. Бундан ташқари, сўнгги тадқиқотлар пипериннинг мия фаолияти учун фойдалилигини аниқлади. У тетикликни оширади, хотирани яхшилайди ва ишлашга ижобий таъсир ўтказади.

Қора мурч озиқ-овқатлардаги кальций, селен, шунингдек, кўк чой ва ўсимликларнинг айрим турларини ўз ичига олган фойдали бирикмаларнинг яхши сингишини таъминлайди. Зираворнинг яна бир фойдали жиҳати шундаки, у микробиом сифатини яхшилашга ёрдам беради. Ичакдаги тўғри бактериал мувозанатни диққат билан кузатиш керак, чунки у танадаги иммунитет функциясидан тортиб кайфиятгача бўлган барча ҳолатларга таъсир қилади.