Франция собиқ президенти Николя Саркози ўзининг коррупция ва мансабни суиистеъмол қилганликда айблаб, қамоқ жазосига ҳукм қилиниши билан боғлиқ суд қарори устидан шикоят киритади. Бу ҳақда Le Figaro Саркозининг адвокати Жаклин Лаффонга асосланиб хабар берган.
Адвокат ўз мижозига чиқарилган суд ҳукми асосланмаганлиги ва холис эмаслигини таъкидлаган. У Саркозининг айбсиз эканлигини исботлашга уринишини ваъда қилган.
Суд Саркозига бир йиллик қамоқ жазоси ва икки йиллик шартли қамоқ жазосини тайинлаган. Адвокат Тьерри Эрзогга ва собиқ прокурор Жильбер Азиберга ҳам худди шундай жазо тайинланган. Улар 2014 йилдаги «махфий эшитувлар» иши юзасидан суд қилинган. Тергов шифрланган алоқа линиясидаги телефон суҳбатлари асосида ўтказилган. Суриштирув маълумотларига асосан Саркози ва Эрзог Азиберга Монакодан юқори мартабали лавозимни эгаллашни таклиф қилиб, ундан Франциянинг бошқа бир собиқ президентига алоқадор ёзувларни олишга уринган.
Якунда улар берган ваъдасининг устидан чиқа олмаган, бироқ мазкур ҳолатда прокуратура амалдаги қонунчиликка кўра барибир коррупция ҳолати қайд этилган деб топган. Саркозининг адвокати асосий суҳбатнинг аҳамиятсиз қисми собиқ президент ва унинг адвокати ўртасида кечганини қайд этган.
Бу Франциянинг ҳарбий тузумдан кейинги тарихида собиқ президентнинг суд олдида жавоб бериши ва қамоқ жазосига ҳукм қилиниши билан боғлиқ биринчи воқеа бўлди. Саркозигача 2011 йилда яна бир собиқ президент Жак Ширак Париж мериясидаги фаолияти давомида қилган ишлари учун суд қилинган. Бироқ у соғлиғидаги муаммолар сабаб ҳеч қачон судда айбдорлик курсисида ўтириб, савол-жавобларда иштирок этмаган.
Март ойи давомида Саркози билан боғлиқ яна бир суд иши бошланиши мумкин. У ва яна 13 киши 2012 йилдаги Саркозининг президентлик кампаниясини ноқонуний олиялаштирганликда гумон қилинмоқда. Саркози бошқарган «Халқ ҳаракати учун иттифоқ» партияси сайловолди кампания учун 42,8 миллион евро, яъни белгиланган лимитдан икки баравар кўп маблағ олганлиги тахмин қилинмоқда. Шубҳали ҳаракатларга қарамай, Саркози 2012 йилдаги сайловларда ютқазган ва социалистлар вакили Француа Олланд президентликка сайланганди.
BFM телеканали Париж ижро трибуналининг 32-палатаси раиси Саркозига тайинланган қамоқ жазоси электрон тасма орқали ижроси назорат қилинадиган уй қамоғига алмаштирилиши мумкинлигини маълум қилганлиги ҳақида хабар берди. Мазкур масала махсус судья томонидан кўриб чиқилади, бироқ ушбу воқеа қачон содир бўлиши сўроқ остида турибди.
Саркозига нисбатан суд ҳукми ҳали ўз кучига кирмаган ва унинг адвокатлари ихтиёрида апелляция бериш учун 10 кун вақт бор. Собиқ президент, унинг собиқ адвокати Тьерри Эрзог ва Конституцион суднинг собиқ судьяси Жильбер Азибернинг ҳимоячилари суд қарори устидан юқори инстанцияга мурожаат қилишини билдирган. Ишга алоқадор бўлган гумондорларни ҳибсга олиш масаласи кўрилмаган ва улар жараёнлар якунига етгунига қадар озодликда бўлади.
2020 йил декабрь ойида Франция прокуратураси Николя Саркозини 4 йилга ҳукм қилишни талаб қилаётгани ҳақида хабар берилган эди.
Изоҳ (0)