«Ишонч» газетаси бош муҳаррири Ҳусан Эрматов «Чимён — 2021» медиафорумида «Газетанинг оммавийлиги унинг индекси бўлиши хусусида сўзлаб, Журналистика ва оммавий коммуникациялар университети ректори Шерзодхон Қудратхўжанинг газеталарнинг яшаб қолиши ҳақидаги фикрларидан дили ранжиганини билдирди. Бу ҳақда Журналистлар ижодий уюшмасининг Фарғона вилоят бўлими томонидан ташкил этилган медиафорумда сўз борди, дея хабар берди «Дарё» мухбири.
Маълум бўлишича, медиафорумга таклиф қилинган «Ишонч» газетаси бош муҳаррири Ҳусан Эрматов «Обуна. Газеталарнинг оммавийлиги индекси бўла оладими? Газета электрон вариантми ёки мустақил сайт?» мавзусида сўз юритган.
«Газетачилик жуда машаққатли касб. Ҳеч иккиланмай айтиш мумкинки, талаба амалиётчига биргина газета корректурасининг ўзи университетнинг бир курси бера олмаган таълимни бера олади. Тўғриси, Шерзодхон Қудратхўжа ректор сифатида ишни эндигина бошлаган пайтларида мен унга ‘Сизлар газетани тушунмайсизлар, талабаларни амалиёт даврларида газетага жўнатинглар, улар таҳририятларда бўлиб, ўша муҳитда тарбияланишсин, газета ҳидидан баҳраманд бўлишсин, зеро, журналистика бу ҳавойи касб эмас, у бир санъат’, деганман. Бироқ таклифим ҳалигача ўз натижасини кўрсатмаган», — деди у.
«Дарё» мухбири Ҳусан Эрматовнинг Шерзодхон Қудратхўжанинг газета ҳақида билдирган мулоҳазалари борасидаги қарашлари билан қизиқди.
«Мен Шерзодхон Қудратхўжанинг газета ҳақидаги фикрини йўлда келаётганда ўқиб қолдим ва жуда хафа бўлдим. Шерзодхон бу фикрни пресс клуб раҳбари сифатида билдирган бўлиши мумкин. Лекин унинг ректор сифатида бундай фикр билдиришга маънавий ҳақи йўқ. Тўғриси, буни унинг ўзига ҳам билдирдим. Маълумки, мамлакатимиздаги 5 та олийгоҳда журналистика факультетлари бор. Ҳеч иккиланмай айтиш мумкинки, Ўзбекистон Журналистика ва оммавий коммуникациялар университети айнан журналистика соҳасида биринчи рақамли таълим муассасаси. Бунда ректор ҳар бир факультетни тарозининг тенг палласига қўйиши муҳим. Тўғри, Шерзодхон замонавий журналистикага чуқурроқ кириб бориш тўғрисида ўйлаяпти. Бироқ ҳеч иккиланишсиз айтиш мумкинки, газетачилик журналистиканинг юраги. Зеро, газета ‘қозонида пишган’ кадргина журналистиканинг бошқа йўналишларини ҳам қийинчиликсиз торта олади. Бугун қайсидир ижтимоий тармоқда ёхуд телевидениеда фаолият юритаётган ёш журналистга диктант ёздириб кўринг... Афсус, ҳақиқат шуки, журналистикада аксарият ҳолатларда яхши мақола ёзолмайдиган, керак бўлса, яхши кўрсатув қила олмайдиган мутахассислар таҳсил олмоқда. Шу маънода истиҳола билан қарамаслигимиз керак. Бу ҳаммамизнинг дардимиз, биз истиҳола қилавериб, масалани очиқ қолдираверсак, эртага газетачилик соҳасида ҳеч ким қолмайди», — деди Ҳусан Эрматов.
Ҳусан Эрматов, шунингдек, мажбурий обуна орқали газеталарни халққа ёмон кўрсатишга эришилгани ҳақида ҳам гапирган.
«Газетачилик соҳасини ривожлантиришда матбуот тарқатувчи корхоналар томонидан ўз вақтида нашрларни манзилига етказиб берилмаётгани ҳам бу соҳанинг ривожига тўсиқ бўлмоқда. Матбуот тарқатувчи шўъба корхоналари ва айрим почта бўлимларининг тарқатувчи ходимлари билан суҳбатлашганимизда, улар 200 минг сўмдан 300 минг сўмгача маош олишаётганини билдирди. Айтинг-чи, ким шу маошга чекка-чекка манзилларгача газета тарқатади?! Улар учун ёниб кетмайдими буёғи?! Биз улар билан газетамизни манзилигача етказиши эвазига 600 минг сўмдан 1 миллионгача маош тўлаш бўйича шартнома туздик. Бу ўзининг ижобий натижасини кўрсатмоқда. Нашрлар раҳбарларига шу масалада бирлашиш таклифини бераман», — деди журналист.
Изоҳ (0)