28 февраль куни Humo Arena муз саройида «Заковат» телеўйинининг Тошкент шаҳри ва Тошкент вилояти учун интеллектуал кастинги ўтказилди.
Тадбирда «Заковат»да иштирок этиш учун рўйхатдан ўтган 7 мингга яқин билимдонлар ва лойиҳа ҳомийси Миллий масс-медиани ривожлантириш жамоат фонди раиси Комил Алламжонов ва унинг ўринбосари Саида Мирзиёева иштирок этди.
Кастингни Миллий масс-медиани ривожлантириш жамоат фонди раиси Комил Алламжонов очиб берди.
Биз илм-фан соҳасида катта ютуқларга эришган даврлар ҳам бўлган.Биринчи телевизион сигнал 1928 йили дунёда илк бор бизда синовдан ўтказилган. Сунъий йўлдошларга ўрнатиладиган қора қути ҳам, Ой ҳамда Венерага учирилган космик кемаларнинг тупроқни бурғулаш мосламалари ҳам Тошкентда ишлаб чиқарилган.
Дунёнинг 86-космонавти Жонибеков ҳам бугунги Бўстонлиқ тумани Искандар қишлоғининг оддий оиласида туғилган. У 5 маротаба космик кема командири сифатида учиб, рекорд ўрнатган.
Бу каби воқеалар ўз вақтида умумжаҳон миқёсидаги ютуқларимиз бўлган. Айтмоқчи бўлган гапим шуки, бугун олдингизда имконият эшиклари яна ланг очилди! Улардан самарали фойдаланайлик.
Аслида бугун шундоқ ҳам кечга қолиб бўлдик, эртага эса янада кеч бўлади. Вақт бизга қарши ишлаяпти. Лекин ҳечдан кўра кеч бўлса ҳам зудлик билан олдинга қадам қўяйлик.
Мен клубимизнинг ҳар бир аъзосини оламга кенг қарашга, улкан мақсадлар қўйиб, улар сари интилишга, ўз устида ишлашга, орзуларини чекламасликка, ҳеч қачон таслим бўлмасликка ва илм йўлидаги шаҳдингизни сўндирмоқчи бўлган ҳеч кимга қулоқ солмасликка чақираман!
Ҳар биримиз майдонда якка-ёлғиз қолгандан кўра, билим атрофида жипслашсак, бирга бўлсак, катта натижаларга эришамиз!
Комил Алламжонов, Миллий масс-медиани ривожлантириш жамоат фонди раиси
Миллий масс-медиани ривожлантириш жамоат фонди раиси ўринбосари Саида Мирзиёева ҳам тадбирда нутқ сўзлади. Кутилмаганда Қуръони Каримдан иқтибос келтириб бошланган сатрлар йиғилганлар учун кутилмаган ҳолга айланди.
«Бисмиллаҳир роҳманир роҳимШунингдек, Саида Мирзиёева клубга аъзо бўлган хотин-қизларни табриклади, уларни фаол бўлишга чақирди: «Хотин-қизларимиз қанчалик фаол, илм-фан, маданият ва тадбиркорликка, сиёсий жараёнларга қанча кўп ҳисса қўшадиган бўлса, юртимизда бахтли ва ҳаётидан мамнун аёллар шунча кўп бўлади. Аминманки, хонадонида намунали бека, пазанда опа-сингилларимиз ўзларини илм майдонида ҳам бемалол намоён қила оладилар», — дейди Мирзиёева.«يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ »
Яъни «Аллоҳ сизлардан имон келтирган ва илм ато этилган зотларни (баланд) даража (мартаба)ларга кўтарур…» – Мужодала сураси, 11-оят.
Ассалому алайкум, билимдонлар!
Ҳар бир инсоннинг ҳаётда мақсади бўлади. Биз бу ерга ягона ва улкан мақсад – мамлакатимизни жаҳон интеллектуал майдонида юқори даражага чиқариш учун йиғилдик.
Бугун ушбу тадбирга турли ёш, турли мавқедаги, дунёқараши ва характери ҳар хил бўлган талабалар, ишчи, хизматчи, пенсионерлар тўпланган. Тўғри, биз бир-биримизга ўхшамаймиз. Лекин ҳаммамизни бирлаштириб турган мақсад бор – илм! Биз эса бугун очаётганимиз – «Илм» деб аталувчи бир китобнинг саҳифаларимиз.
Ҳаёт — бу университет. Уни самарали ва яхши натижалар билан якунлаш жуда муҳим. Таълим олиш, имтиҳон топшириш, олинган билимларни қўллаш ва муносиб баҳоланиш… Қандай баҳо олишимиз фақат ўзимизга боғлиқ.
Саида Мирзиёева, Миллий масс-медиани ривожлантириш жамоат фонди раиси ўринбосари
«Заковат» мусобақаларига 1 миллиард 690 миллион сўм ажратилган. Тошкент шаҳри ва вилояти ўйинлари учун ажратилган ютуқ фонди эса 130 миллион сўм. Ажратилган маблағ брейн-ринг танловлари ташкил этилиб, унда ғолиб бўлган жамоаларга тақдим этилади.
Очилиш маросимидан сўнг интеллектуал кастингда иштирокчиларга жами 40 та савол берилди. Уларнинг 30 таси фактга асосланган саволлар бўлса, қолган 10 таси мантиқий саволлардан иборат бўлди. Фактга асосланган саволларни ўйлаш учун 20 сония, мантиқий саволларга эса 1 дақиқа вақт берилди.
Кастингдан кейин иштирокчилар рейтинги тузилади. Унинг асосида иштирокчилар 6 кишилик жамоаларга тақсимлаб чиқилади. Тақсимлаш рейтингдаги кетма-кетликка асосланган ҳолда амалга оширилади. Масалан, 1-ўриндан 6-ўрингача бўлган иштирокчилар битта жамоа, 7-12-ўринлардаги аъзолар кейинги жамоага бирлаштирилади. Якка тартибда рўйхатдан ўтганлар рейтингдаги ўрнидан қатъи назар, ўзаро келишган ҳолда ўз ташаббуси билан бир жамоага бирлаша олмайди. Кастингдан асосий мақсад аъзоларни ўтди ёки ўта олмади, деб саралаш эмас, балки шунчаки уларнинг бирламчи билим даражаларини аниқлаб олиш бўлади. Бу келгусида уларни турли лигаларда ва турнирларда иштирок этиши учун ҳам муҳим аҳамиятга эга.
Бошқача айтганда, кастингдан сўнг қониқарсиз натижа қайд этгани учун ҳеч ким клуб аъзолигидан чиқариб юборилмайди ёки турнирда қатнашиш ҳуқуқини йўқотмайди. Аммо юқори натижа қайд этганларга келгуси турнирларда кўпроқ имконият берилиши мумкин.
Ҳар бир иштирокчи ўзига берилган махсус титул варағига жавобларни ёзиши талаб этилади. Кастинг натижалари 2 кун ичида маълум қилинади. Иштирокчилар ўз натижасини www.заковат.тв сайти орқали аниқлаб олиши мумкин бўлади.
Изоҳ (0)