“Ishonch” gazetasi bosh muharriri Husan Ermatov “Chimyon — 2021” mediaforumida “Gazetaning ommaviyligi uning indeksi bo‘lishi xususida so‘zlab, Jurnalistika va ommaviy kommunikatsiyalar universiteti rektori Sherzodxon Qudratxo‘janing gazetalarning yashab qolishi haqidagi fikrlaridan dili ranjiganini bildirdi. Bu haqda Jurnalistlar ijodiy uyushmasining Farg‘ona viloyat bo‘limi tomonidan tashkil etilgan mediaforumda so‘z bordi, deya xabar berdi “Daryo” muxbiri.
Ma’lum bo‘lishicha, mediaforumga taklif qilingan “Ishonch” gazetasi bosh muharriri Husan Ermatov “Obuna. Gazetalarning ommaviyligi indeksi bo‘la oladimi? Gazeta elektron variantmi yoki mustaqil sayt?” mavzusida so‘z yuritgan.
“Gazetachilik juda mashaqqatli kasb. Hech ikkilanmay aytish mumkinki, talaba amaliyotchiga birgina gazeta korrekturasining o‘zi universitetning bir kursi bera olmagan ta’limni bera oladi. To‘g‘risi, Sherzodxon Qudratxo‘ja rektor sifatida ishni endigina boshlagan paytlarida men unga ‘Sizlar gazetani tushunmaysizlar, talabalarni amaliyot davrlarida gazetaga jo‘natinglar, ular tahririyatlarda bo‘lib, o‘sha muhitda tarbiyalanishsin, gazeta hididan bahramand bo‘lishsin, zero, jurnalistika bu havoyi kasb emas, u bir san’at’, deganman. Biroq taklifim haligacha o‘z natijasini ko‘rsatmagan”, — dedi u.
“Daryo” muxbiri Husan Ermatovning Sherzodxon Qudratxo‘janing gazeta haqida bildirgan mulohazalari borasidagi qarashlari bilan qiziqdi.
“Men Sherzodxon Qudratxo‘janing gazeta haqidagi fikrini yo‘lda kelayotganda o‘qib qoldim va juda xafa bo‘ldim. Sherzodxon bu fikrni press klub rahbari sifatida bildirgan bo‘lishi mumkin. Lekin uning rektor sifatida bunday fikr bildirishga ma’naviy haqi yo‘q. To‘g‘risi, buni uning o‘ziga ham bildirdim. Ma’lumki, mamlakatimizdagi 5 ta oliygohda jurnalistika fakultetlari bor. Hech ikkilanmay aytish mumkinki, O‘zbekiston Jurnalistika va ommaviy kommunikatsiyalar universiteti aynan jurnalistika sohasida birinchi raqamli ta’lim muassasasi. Bunda rektor har bir fakultetni tarozining teng pallasiga qo‘yishi muhim. To‘g‘ri, Sherzodxon zamonaviy jurnalistikaga chuqurroq kirib borish to‘g‘risida o‘ylayapti. Biroq hech ikkilanishsiz aytish mumkinki, gazetachilik jurnalistikaning yuragi. Zero, gazeta ‘qozonida pishgan’ kadrgina jurnalistikaning boshqa yo‘nalishlarini ham qiyinchiliksiz torta oladi. Bugun qaysidir ijtimoiy tarmoqda yoxud televideniyeda faoliyat yuritayotgan yosh jurnalistga diktant yozdirib ko‘ring... Afsus, haqiqat shuki, jurnalistikada aksariyat holatlarda yaxshi maqola yozolmaydigan, kerak bo‘lsa, yaxshi ko‘rsatuv qila olmaydigan mutaxassislar tahsil olmoqda. Shu ma’noda istihola bilan qaramasligimiz kerak. Bu hammamizning dardimiz, biz istihola qilaverib, masalani ochiq qoldiraversak, ertaga gazetachilik sohasida hech kim qolmaydi”, — dedi Husan Ermatov.
Husan Ermatov, shuningdek, majburiy obuna orqali gazetalarni xalqqa yomon ko‘rsatishga erishilgani haqida ham gapirgan.
“Gazetachilik sohasini rivojlantirishda matbuot tarqatuvchi korxonalar tomonidan o‘z vaqtida nashrlarni manziliga yetkazib berilmayotgani ham bu sohaning rivojiga to‘siq bo‘lmoqda. Matbuot tarqatuvchi sho‘ba korxonalari va ayrim pochta bo‘limlarining tarqatuvchi xodimlari bilan suhbatlashganimizda, ular 200 ming so‘mdan 300 ming so‘mgacha maosh olishayotganini bildirdi. Ayting-chi, kim shu maoshga chekka-chekka manzillargacha gazeta tarqatadi?! Ular uchun yonib ketmaydimi buyog‘i?! Biz ular bilan gazetamizni manziligacha yetkazishi evaziga 600 ming so‘mdan 1 milliongacha maosh to‘lash bo‘yicha shartnoma tuzdik. Bu o‘zining ijobiy natijasini ko‘rsatmoqda. Nashrlar rahbarlariga shu masalada birlashish taklifini beraman”, — dedi jurnalist.
Izoh (0)