Самарқанд туманининг «Бўзи» маҳалласи раиси «Шиша» қабристонидаги кесилган дарахтлар орқали ўсимлик дунёсига 128 миллион 745 минг сўм зарар етказгани маълум бўлди. Бу ҳақда «Дарё»га вилоят экология ва атроф-муҳитни муҳофаза қилиш бошқармаси ахборот хизмати хабар берди.
Маълум қилинишича, «Шиша» қабристонидаги дарахтларнинг кесилиши юзасидан Самарқанд тумани Экология ва атроф-муҳитни муҳофаза қилиш инспекцияси назорат инспекторлари томонидан ўрганиш ишлари олиб борилиб, натижа туман прокуратурасига тақдим қилинган.
«Ўрмон фондига кирмайдиган дарахт ва буталар ноқонуний кесилганлиги учун мансабдор шахсларга жами ҳисобланган 25 миллион 749 минг сўм зарарнинг беш баробари миқдорида, яъни 128 миллион 745 минг сўм жарима қўлланилмоқда», — дейилади бошқарма ахборот хизмати тақдим этган маълумотда.
Эслатиб ўтамиз, аввалроқ Самарқандда маҳалла раиси қишлоқ қабристонидаги дарахтларни кестириб ташлагани, фуқаролар эса бундан норозилиги маълум қилинганди.
Изоҳ (0)