Тошкент ва Янгийўл туманлари аҳолиси табиий газ таъминотидан узиб қўйилгани ҳамда электрон газ ҳисоблагич ўрнатилган хонадонларда газнинг автоматик тарзда ўчиб қолиши ва тўлов мавжуд бўлганига қарамай тармоққа қайта уланиш муаммолари 23—24 февраль кунлари ижтимоий тармоқларда кўплаб кескин муҳокамаларга сабаб бўлганди. Истеъмолчилар ҳуқуқларини ҳимоя қилиш агентлиги бунга электрон газ ҳисоблагичларни ўрнатиш жараёнида далолатномалар нотўғри расмийлаштирилгани сабаб бўлганини маълум қилганди.
«Ҳудудгазтаъминот» бу ҳолатга расмий муносабат билдириб, газ таъминоти огоҳлантиришларга қарамай, истеъмолчилар тўловларни амалга оширмагани учун газ таъминотидан ўчирилганини билдирди.
Хабарда айтилишича, Янгийўл тумани ва Янгийўл шаҳрида ҳозирги кунда жами 55 641 та газ истеъмолчиси мавжуд бўлиб, шулардан 16 970 тасига замонавий газ ҳисобдон ўрнатилган. Истеъмол қилинган табиий газ учун қарздорлик 2 миллиард 401 миллион сўмдан ортиқни ташкил этмоқда.
Жумладан, Янгийўл туманидаги хонадонларда иссиқхоналар мавжуд бўлган «Дархон» маҳалласида 337 та истеъмолчи бўлиб, 2019 йилнинг декабрь ойида 68,6 миллион сўмлик жами 180,5 минг куб метр табиий газ етказиб берилиб, ундирилган маблағ атиги 48,2 фоизни ташкил этган. 2020 йил мазкур маҳаллага тўлиқ замонавий ҳисобдонлар ўрнатилиб, натижада 2021 йилнинг январь ойи ҳолатига кўра, 110,9 миллион сўмлик 288,3 минг куб метр (2019 йил декабрь ойига нисбатан 4,2 баробар кўп) табиий газ етказиб берилиб, тушум кўрсаткичи 215,3 фоизни ташкил қилган.
Истеъмол қилинган табиий газ учун қарздорлиги бўлган истеъмолчиларга тармоқдан автоматик тарзда ўчирилишларидан 3 кун аввал, газ ҳисоблагич ўрнатилаётган вақтда имзоланган шартномага истеъмолчи томонидан тақдим этилган телефон рақамига огоҳлантириш SMS хабарлар юборилмоқда ва янги тизим жорий этилаётганини ҳисобга олган ҳолда, бу каби SMS’лар бир неча марта истеъмолчиларга жўнатилмоқда. Огоҳлантиришларга қарамай, тўловларни амалга оширмаган истеъмолчилар учун газ таъминоти автоматик тарзда тўхтатилмоқда.
«Ҳудудгазтаъминот» шу билан бирга, истеъмолчилар орасида нореал қарздорлик ҳисобланиши оқибатида газ таъминотидан узилиш бўйича масалалар юзага келаётганига ҳам изоҳ бериб ўтган.
«Юқоридаги ҳолатлар бўйича истеъмолчиларнинг барча мурожаатлари мутахассислар томонидан кўриб чиқилмоқда. Таҳлиллар шуни кўрсатмоқдаки, бундай ҳолатлар пайдо бўлишида асосан авваллари газ ҳисоблагичдаги кўрсаткичларнинг BillingGaz тизимига нотўғри киритилганлиги, ҳисобдонлар носозлиги ва бошқа сабаблар туфайли юзага келган», — дейилади хабарда.
Бундан ташқари, нореал қарздорлик бўйича шикоят қилаётганлар орасида аввал ўрнатилган ҳамда АСКУГ тизимини қўллаб-қувватламайдиган маиший газ ҳисоблагичлардаги кўрсаткичларни «орқага» қайтарганлар ҳам аниқланаётгани қайд этилган. «Ҳудудгазтаъминот» истеъмол қилинган табиий газ тўловларидан «тежаш» мақсадида газ ҳисоблагич кўрсаткичларини «орқага» айлантирмасликка чақириб, бундай хатти-ҳаракатлар ноқонунийлигини эслатиб ўтган.
Шунингдек, табиий газ бўйича ҳисоб-китобни юритиш онлайн тизимга ўтказилаётгани таъкидлаб ўтилган.
«Истеъмолчиларда баҳсли ҳолатлар мавжуд бўлмаган тақдирда, қимматли вақтни туман ёки шаҳар газ бўлимларига қатнаб, зое кетказмай, ўз шахсий кабинетлари орқали табиий газ истеъмоли, амалга оширилган тўлов ва мавжуд пенялар ҳолатини онлайн тарзда назорат қилиб боришлари мумкин. Бундан ташқари, фойдаланилган табиий газ учун тўловларни уйдан чиқмасдан Payme, Paynet, Click, U-Pay ва Oson мобил иловаларидан бири орқали тез ва осон амалга ошириш мумкин», — дейилади «Ҳудудгазтаъминот» хабарида.
Аввалроқ «Ҳудудгазтаъминот» Андижонда газ ҳисоблагич портлаганига изоҳ берганди.
Изоҳ (0)