Ўзбекистон 2021 йилнинг январь ойида қарийб 50 га яқин хорижий давлатларга қиймати 193,2 миллион АҚШ долларига тенг бўлган тўқимачилик маҳсулотларини экспорт қилган. Бу ҳақда Давлат статистика қўмитаси матбуот хизмати хабар берди.
Таъкидланишича, ушбу кўрсаткич 2019 йилнинг мос даврига нисбатан 38,5 миллион долларга ошган.
Январь ойи мобайнида Ўзбекистон тўқимачилик маҳсулотларини энг кўп экспорт қилган давлатлар:
- Россия — 62,9 миллион доллар;
- Хитой — 58,2 миллион;
- Қирғизистон — 24,4 миллион;
- Туркия — 17,0 миллион;
- Польша — 3,8 миллион;
- Қозоғистон — 3,4 миллион;
- Покистон — 3,1 миллион;
- Эрон — 2,6 миллион;
- Миср — 2,5 миллион;
- Украина — 2,4 миллион;
- Озарбайжон — 1,3 миллион;
- Италия — 1,1 миллион.
Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис Ўзбекистон пахтаси халқаро жамоатчилик томонидан «қора рўйхатлар»га киритилган, етакчи ишлаб чиқарувчилар Ўзбекистон пахтасини бойкот қилган эди. Халқаро меҳнат ташкилотининг Вашингтондаги офиси директори Кевин Кассиди эса ўзбек пахтаси бойкотини асоссиз деб эълон қилганди.
2019 йилнинг 4 февралида ўша вақтда бош вазир ўринбосари бўлган Танзила Норбоева бошчилигидаги делегациянинг Вашингтонга ишчи ташрифида Cotton Campaign тўқимачилик маҳсулотларига қарши бойкотни бекор қилиш бўйича режасини тақдим этган эди.
Cotton Campaign халқаро коалицияси вакиллари 27 январь—6 февраль кунлари Ўзбекистонда ишчи ташриф билан бўлган эди. Улар билан бўлиб ўтган учрашувда иштирок этган инвестициялар ва ташқи савдо вазири Сардор Умрзоқов Ўзбекистон тўқимачилик саноатини бойкот қилишдан фойда йўқлигини айтганди.
Изоҳ (0)