Samarqandlik erkak savdo markazlarining birida rashk sabab xotini va uning jazmani deya taxmin qilingan shaxsni pichoqlab qo‘ygani haqida xabar berilgandi.
Ma’lum qilinishicha, ko‘ngilsiz hodisa 20-noyabr kuni soat taxminan 18:00 larda Mirzo Ulug‘bek ko‘chasida joylashgan savdo markazida sodir bo‘lgan. 42 yoshli pastdarg‘omlik erkak do‘konda turmush o‘rtog‘i va uning o‘ynashi deya taxmin qilingan shaxsga duch kelgan va odamlar orasida ularga pichoq bilan tashlangan. Ta’kidlanishicha, jabrlanuvchilar qon ketishi oqibatida voqea joyida vafot etgan.
Ayblanuvchi tariqasida tergovga jalb qilingan erkak voqea qanday bo‘lganini so‘zlab berdi.
“Iyul oylarida uni o‘zgarib qolganini sezdim. To‘g‘ri yurgin, bolalarimiz katta bo‘lyapti, qizimiz voyaga yetyapti, dedim. U hech qanaqa noto‘g‘ri yurganim yo‘q, dedi. U savdogarlik qilardi, o‘zi pul topardi, bir kuni o‘zimizdagi bir bola bilan Instagram’da gaplashayapti. Unga gapirdim. Onasiga murojaat qildim. Keyin yana uch marta telefonda gaplashayotganida ushlab oldim. Janjal, kelishmovchilik boshlandi.
Savdo majmuasiga kelgandan keyin ularni 5 daqiqa qidirdim. Qarasam, Samsung do‘konida qo‘l ushlashib, ko‘ngilxushlik qilib, telefon ko‘rib yurgan ekan. Keyin rashk ustida qanday ularni oldiga kirib borganimni bilmayman. Tashqariga chiqdim, qarasam qo‘llarim qon. Ularni pichoqlab qo‘yganimni sezdim. O‘ldirib qo‘yganimni bilmadim. Qilgan ishimdan pushaymonman. O‘shanda rashk ustida o‘zimni bosolmay qoldim. Aslida militsiya xodimlariga bularni topshirib yuborishim kerak ekan”.
Eslatib o‘tamiz, ushbu holatni videotasvirga tushirib tarqatgan 3 nafar samarqandlik yigit ham qamoqqa olingan.
