Фарғонада муқаддам судланган тадбиркор ўзининг қизи билан ёзишиб юрган вояга етмаган ўсмирни калтаклади, деб хабар беради Repost.
Маълумотларга кўра, 21 февраль куни «Тожмаҳал» меҳмонхонаси, банкет зали ва алкоголь маҳсулотлари билан савдо қилувчи қатор дўконлар, Wine Garden ресторани эгаси Баҳодир Пайғамов ҳамда унинг 11-синфда ўқийдиган Нурмуҳаммад Комилжонов исмли ўғли яқиндагина 40-сонли мактабда ўқишни бошлаган 14 ёшли Ҳожиакбар Шавкатзодани калтаклаган. Пайғамов бунга қадар Жиноят кодексининг 97- ва 164-моддалари (қотиллик, босқинчилик) билан судланган.
Маълум қилишича, кўнгилсиз ҳодиса Қурувчилар-2 кўчасидаги Киргили турар жой мавзесида содир бўлган. Шунингдек, «Парвоз» мактабининг ўқувчиси 14 ёшли йигитга пичоқ билан таҳдид қилган. Ҳожиакбарнинг калтакланишига унинг Баҳодир Пайғамовни қизи билан ёзишмалар орқали мулоқоти сабаб бўлган. Жабрланувчи 9-синф ўқувчиси Фарғонадаги шошилинч тиббий ёрдамининг нейрожарроҳлик бўлимига ётқизилган.
«Ўғлим бир ҳафта олдин 9-синфни ‘Сириус’ хусусий мактабида ўқишни бошлади. Параллел синфда ёки синфдоши бўлган қиз билан танишиб қолган. Улар ёзишиб юрган. Уйда йўқлигимда қизнинг отаси ва акаси келиб ёзишмалари сабаб уни калтаклаган. Ўғлим 9-синфда ўқийди. Ҳозирда унинг аҳволи оғир ва мактабга бормаяпти. Бу каби ёмон одамларни халққа кўрсатинг. Баҳодир деганлари икки аёлни ўлдириб, Каркидонда ёқиб юборган. Ўтириб чиққан бўлса ҳам, ақли кирмаган. 14 ёшли болани шунчалик калтаклаш мумкинми», — дейди жабрланувчининг онаси Гулруҳ Собирова.
Баҳодир Пайғамов ҳам мазкур кўнгилсиз ҳодисага изоҳ бериб, жабрланувчининг онасидан кечирим сўраган.
«Кечиринг синглим, минг бор узр, биз ҳам билмас эдик. Мен фақатгина қизимнинг иззатини ҳимоя қилдим. Бунчалик бўлиб кетишини билмагандим», — дейди Пайғамов.
Ҳолат юзасидан иш очилган, бироқ тергов жараёнлари ҳали бошланмаган.
Аввалроқ фарғоналик йигит интернет орқали танишган қизи унга турмушга чиқмаслигини айтгани учун қизнинг уйига бориб, 2 ойлик чақалоқни ўлдиргани тўғрисида хабар берилганди.
Изоҳ (0)