23 февраль куни АОКАда ўтказилган матбуот анжуманида ДТМ директори ўринбосари Сардор Ражабов 2021 йилда бакалавриат таълим йўналишларига киришда қайси фанлардан имтиҳон олиниши тез орада эълон қилинишини маълум қилди.
«Ҳозирда Давлат тест маркази ва тегишли вазирликлар билан биргаликда фанлар мажмуаси ишлаб чиқилган. Марказнинг асосий вазифаси умумлаштириш ҳисобланади. Яъни вазирликлар берадиган таклифларга биноан иш тутади. Бу мутахассислар томонидан ўрганилмоқда ва тез кунда эълон қилинади. Аввалги йил билан солиштирадиган бўлсак, жуда катта фарқ бўлмайди», — дейди Ражабов.
«Давлетовуз» Twitter’даги саҳифаси орқали «Биратўла июлда эълон қила қолинглар», дея муносабат билдирган. Блогер, ҳуқуқшунос Хушнудбек Худойбердиевнинг ёзишича, Президентнинг 2019 йил 14 майдаги қарори билан ҳозирча фақат қуйидаги қоидалар маълум:
Мажбурий фанлар блоки (барча учун тушади):
- она тили (ўзбек, рус ёки қорақалпоқ тили) — 15 та савол, ҳар бири учун 2.1 баллдан;
- математика — 15 та савол, ҳар бири учун 2.1 баллдан;
- ўзбекистон тарихи — 15 та савол, ҳар бири учун 2.1 баллдан.
Мутахассислик блокидаги фанлар (таълим йўналишига қараб ўзгаради):
- биринчи фан — 30 та савол, ҳар бири учун 3.1 баллдан;
- иккинчи фан — 30 та савол, ҳар бири учун 3.1 баллдан.
- жами тўплаш мумкин бўлган балл — 186 балл.
«Балларни ҳисоблаш тизимида ўзгариш бўлмайди, аввал қандай бўлса, шундайлигича қолади. Яъни ҳар бир блокдан тўпланган баллар қўшилиб, умумий баллни ташкил этади ва абитуриентлар мана шу 5 та блокдан тўплаган балли бўйича ўзаро курашади (жорий йил 2 та блокнинг умумий балли олинди). Энг максимал балл 280,5 балл бўлади», — деб ёзади блогер.
Эслатиб ўтамиз, 2020 йилги имтиҳонлар учун фанлар мажмуаси 2019 йилнинг 21 декабрь куни, яъни тест синовларидан 9 ой олдин расман тасдиқланган эди. Ҳозир эса имтиҳонларга 6 ойдан камроқ вақт қолди, деб ёзади «Gazeta.uz».
Аввалроқ Ўзбекистонда кириш имтиҳонида энг юқори балл тўплаган 200 нафар талабага Президент гранти берилиши, абитуриентлар чекланмаган миқдорда таълим йўналишларини танлаши мумкинлиги тўғрисида хабар берилганди.
Изоҳ (0)