Пиджаклар ёрдамида қандай қилиб замонавий образ яратиш мумкин? (фото)

Ташқи кўриниш, албатта, либос, аксессуар ҳамда пардоз билан боғлиқ бўлиб. Бунда асосан кийим алоҳида ўринга эга. Уларни қачон ва нималар билан кийишни билиш эса замонавий образ яратишда ёрдам беради.

Мода оламида тор ва ёпишиб турувчи шимлар ўрнини кенг ва тўғри бичимдагилари эгаллади. Аммо ҳанузгача қизлар уларни қулай деб билади. Айниқса, қоматни таъкидлагани учун ҳам қадрлайди. Бу каби шим билан замонавий образ яратиш учун кенг бичимдаги пиджак кийиш кифоя.

Спорт кийимлари қулай бўлишига қарамай, ҳамма кийим билан уйғунлашиб кетавермайди. Оддий футболка ва кроссовка билан ёрқин рангдаги пиджакда нафақат сайрга чиқиш, балки дўстлар билан ҳам учрашиш мумкин.

Шунингдек, кенг ва бироз узунроқ костюмлар юбканинг калталигини яширади. Қоматни таъкидлашга, образни бойитишга ёрдам беради.

Белни таъкидлаш ва бўйни визуал тарзда узайтириш учун бу каби костюмларни белбоғ билан кийиш тавсия этилади. Фақатгина белбоғни ўта қаттиқ тортиб тақмаслик зарур. Чунки бу кийимда хунук бурмаларни келтириб чиқаради ва образга путур етказади.

Романтик услубни ёқтирувчилар учун кўйлак ва пиджак ажойиб комбинацияни ҳосил қилади. Шунингдек, гулли либослар, кенг юбкалар билан ҳам кийиш мумкин. Пиджак билан ҳосил қилинган янги комбинация образдаги мувозанатни сақлашга ёрдам беради.

Пиджакларнинг калтароқ бичимдагисини юбка ёки классик шимлар билан айнан шу тарзда бирлаштириш мумкин. Албатта, янги услубларни ўзлаштиришда эҳтиёт бўлиш зарур. Аммо тажрибали хонимлар ушбу образни хотиржамлик билан синаб кўриши мумкин.

Кенг бичимдаги жинси ва оқ футболка биргаликда жуда содда кўриниши аниқ. Тасвирга бироз зеб бериш учун классик пиджак тавсия этилади. Замонавий образ яратувчилари эса қўл қисмини бироз кўтариб, аксессуарга алоҳида эътибор қаратиши керак.

Бундан ташқари, пиджакларни қарама-қарши ранг ёки нақшлиларидан кийиб кўриш ҳам янгилик ҳисобланади. Албатта, кайфият ва дидга қараб, маъқул келган вариантни танлаш мумкин.

Замонавий образ яратишнинг яна бир сири шундаки, костюмларга мос свитер танлашдир. Бир хил ёрқин рангдаги свитер ва костюм ҳақиқий уйғунликка эришади ва образга ўзгачаликни олиб киради.