Халқ депутатлари Наманган шаҳар кенгашининг навбатдан ташқари сессияси бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Сессияда вилоят марказида бугунги кунда мавжуд муаммолар муҳокама қилинди. Жумладан, шаҳар секторлари раҳбарларининг рейтингдаги ўринлари пастлиги, экспорт режалари бажарилмагани, бандлик, маҳаллаларни ободонлаштириш ва кўкаламзорлаштириш ишларига етарлича эътибор қаратилмагани танқид қилинди.
Сессияда ташкилий масала кўрилди.
Вилоят ҳокими Шавкатжон Абдураззоқов Наманган шаҳри ҳокимлигига шу пайтга қадар Тошкент шаҳар ҳокимининг ўринбосари — уй-жой коммунал хизмат кўрсатиш бош бошқармаси бошлиғи бўлиб ишлаб келган Ғофур Жамолов номзодини таклиф қилди.
Депутатлар ва фаоллар номзод юзасидан фикр-мулоҳазаларини билдирди. Номзод улар томонидан маъқулланди.
Маълумот учун, Ғофур Жамолов 1974 йилда Наманган шаҳрида туғилган. 1997 йилда Наманган саноат-технология институтини, 2006 йилда Ўзбекистон Президенти ҳузуридаги Давлат ва жамият қурилиши академиясини тамомлаган.
У 1997—2009 йиллар давомида Наманган шаҳри ва Наманган вилояти ҳокимликларида турли масъул лавозимларда меҳнат қилган. 2009—2020 йилларда Иқтисодиёт вазирлиги бош мутахассиси, бўлим бошлиғи, уй-жой, коммунал хизмат вазирининг ўринбосари бўлиб ишлаган.
Ғофур Жамолов 2020 йилдан то шу кунга қадар Тошкент шаҳар ҳокимининг ўринбосари — уй-жой коммунал хизмат кўрсатиш бош бошқармаси бошлиғи сифатида фаолият юритиб келган.
Эслатиб ўтамиз, Президент Шавкат Мирзиёев Наманган вилоятига ташрифи чоғида «Бунёдкор» маҳалласида бўлиб, шаҳар ҳокими ва ҳудудга масъул прокурорга «Маҳалла аҳволини қаранглар, бу сизнинг юзингиз», дея танбеҳ берган эди.
Бундан аввал Наманган ҳокими бугундан бошлаб Президент ҳолатини танқид қилган маҳаллада яшашини маълум қилгани, «тўртлиги» лавозимидан озод қилинган Уйчи туманига янги ҳоким тайинлангани ҳамда Олмазор тумани Ички ишлар органлари фаолиятини мувофиқлаштириш бошқармасига янги бошлиқ тайинлангани ҳақида хабар берилганди.
Изоҳ (0)