Фавқулодда вазиятлар вазирлиги (ФВВ) матбуот хизмати бошлиғи аҳолига ўзбошимчалик билан турар жой биноларининг кириш қисмига сунъий тўсиқларни ўрнатмасликни сўраб мурожаат қилди.
Қайд этилишича, ёнғин содир бўлган ҳудудга етиб боришда ёнғин-қутқарув экипажи аксарият ҳолларда бир қанча тўсиқларга дуч келади. Аҳоли томонидан ўзбошимчалик билан турар жой биноларининг кириш қисмига ўрнатилган сунъий тўсиқлар ҳам шулар жумласидан. Бу ёнғинни бартараф этиш учун келаётган ёнғин-қутқарув гуруҳи учун қатор ноқулайликлар юзага келтирмоқда. Бу эса ўз навбатида қутқарувчилар вақтининг беҳуда сарфланишига олиб келмоқда.
«Мазкур ҳолатларда бу каби сунъий тўсиқларни бартараф этиш лозим ҳисобланади. Қандай ҳолат бўлмасин, юқорида санаб ўтилган омиллар қутқарувчиларнинг ҳодиса жойига кечикиб келишига сабаб бўлмоқда. Шу муносабат билан ФВВ фуқароларимиздан ўзбошимчалик билан турли предметлардан сунъий тўсиқ билан ички кўчаларни тўсиб қўймасликларини сўрайди», — дейилади вазирлик мурожаатида.
ФВВ, шунингдек, автомашиналарни яшаш уйларининг кириш қисмига қўймасликларини, бундай ҳаракатлар ҳам ёнғин ўчириш экипажларининг тезкор ҳаракатларини чеклашини эслатиб ўтган.
Изоҳ (0)