Хитой-ўзбек вакцинаси коронавируснинг «британча» ва «африкача» штаммларига қарши Moderna вакцинасидан олти баробарга яхшироқ бўлиб чиқди

Хитой ва Ўзбекистон ҳамкорлигидаги коронавирусга қарши ZF-UZ-VAC 2001 вакцинаси COVID-19’нинг Британия ва Жанубий Африка штаммларга қарши Американинг Moderna вакцинасидан олти баравар яхшироқ бўлиб чиқди. Бу ҳақда инновацион ривожланиш вазирининг биринчи ўринбосари Шаҳло Турдиқулова «Ўзбекистон 24» телеканалига берган интервьюсида маълум қилди.

«Хитойлик ҳамкасбларимиз билан биргаликда коронавирусга қарши дунёдаги энг самарали ва хавфсиз вакциналардан бирини яратдик ва унга ZF-UZ-VAC 2001 бренд номи берилди… Мазкур вакцина кўплаб жиддий клиник синовлардан ўтди. Барча ишлар жуда қаттиқ стандартлар бўйича, халқаро талабларга мос равишда ўтказилмоқда. Ҳозирча вакцина ЖССТда рўйхатдан ўтказишдан олдинги босқичда», — дейди вазир ўринбосари.

Унинг сўзларига кўра, Ўзбекистонда 2020 йилнинг ноябрида хитойлик мутахассислар жамоаси етиб келган бўлиб, улар маҳаллий олимлар ва тиббиёт ходимлари билан биргаликда дастлабки вакцинация ишларини амалга оширмоқда.

«Яқинда Call-марказни ишга туширдик, унинг асосий вазифаси эмланаётган инсонлар соғлиғини мунтазам мониторинг қилишдан иборат. Ушбу Call-марказга одамлар оммавий эмланиш вақтида мурожаат қилишлари мумкин. Вакцинациянинг Хитойда ўтказилган биринчи ва иккинчи фазалари якунига кўра, шунингдек, Ўзбекистонда 7 минг киши устида ўтказилган тадқиқотлар давомида олинган маълумотлар вакцина хавфсизлиги 99 фоиздан ошишини кўрсатмоқда», — дея таъкидлайди Турдиқулова.

Шунингдек, вазир ўринбосарининг қўшимча қилишича, ушбу вакцина ножўя таъсирларни деярли келтириб чиқармайди. Вакцинанинг иммуногенлиги 97 фоизни ташкил этади, иккинчи дозадан кейин антитаналар ишлаб чиқариш даражаси 11 бараварга ортган.

«Яқинда ўтказилган тадқиқотлар вакцинанинг Британия ва Жанубий Африка штаммларига қарши юқори самарадорликка эгалигини кўрсатди. Шунингдек, ушбу вакцина оддий музлаткичли шароитда, яъни 8 даражада сақланиши ва ташилиши мумкинлиги муҳим аҳамиятга эга», — дея қайд этади у.

Эслатиб ўтамиз, Ўзбекистонда коронавирусга қарши эмлаш март ойининг биринчи ярмида бошланиши маълум қилинган. Махсус комиссия қарорига кўра, Ўзбекистонда Россиянинг Гамалея илмий-тадқиқот маркази томонидан ишлаб чиқилган «Спутник V» вакцинасини қўллашга рухсат берилди. Коронавирусга қарши курашиш тадбирлари ва вакцина учун 3 триллион сўм ажратиш режалаштирилган.