Бош прокуратура «Ўзбекистон Республикасининг Жиноят кодексини тасдиқлаш тўғрисида»ги қонун лойиҳасини муҳокамага қўйди. Жиноят кодексининг янги таҳририда давлат хизматчисининг ноқонуний бойлик орттиришига қарши модда ҳам пайдо бўлади.
Таклиф этилаётган моддада давлат хизматчисининг даромад ва мол-мулк декларациясида назарда тутилганидан ортиқ пул маблағлари ёки мол-мулкка ноқонуний эга бўлиши ёки шундай мулкни орттириши анча миқдорда содир этилган бўлса, базавий ҳисоблаш миқдорининг 100 бараваридан 200 бараваригача жарима ёки уч йилгача иш ҳақидан ушлаб қолиш билан жазоланади.
Қонун лойиҳасининг изоҳида таъкидланишича, БМТнинг коррупцияга қарши конвенциясида (20-модда) ноқонуний равишда бойлик орттириш жиноятлар қаторига киритилган ва бунга қарши Литва, Европанинг бошқа давлатлари, Ҳиндистон, Хитой, Аргентина ва Гонконгга жиноий жавобгарлик мавжуд.
Жиноят кодексининг янги таҳририда «коррупцион жиноят» тушунчаси жорий этилиб, ушбу соҳадаги жавобгарлик кучайтирилмоқда.
Хусусан, коррупциявий жиноятлар учун жавобгарликка тортиш борасидаги даъво муддатини 1,5 бараварга ошириш ва моддий манфаат билан бирга, номоддий фойда ҳисобланувчи пора воситалари учун тегишли нормаларни жорий этиш таклиф қилинмоқда.
Эслатиб ўтамиз, Ўзбекистонда мансабдор шахс томонидан ноқонуний бойлик орттирганлик учун жиноий жавобгарлик белгилаш таклиф 2020 йилнинг ноябрида Коррупцияга қарши курашиш миллий кенгашининг 2-йиғилишида илгари сурилганди.
Изоҳ (0)