АҚШнинг Техас штатида, дастлабки маълумотларга кўра, совуқдан вафот этган боланинг оиласи судга ERCOT Техас энергетика компаниялари гуруҳи (Electric Reliability Council of Texas) ва Entergy Corporation компаниясига қарши 100 миллион долларлик даъво киритди. Бу ҳақда оиланинг адвокати Тони Бузбининг маълумотига асосланиб, «РБК» хабар берди.
Хабарда айтилишича, 11 ёшли бола 16 февраль куни электр энергияси узилиши сабабли иссиқлик ва ёруғликсиз қолган трейлерда тунаганидан кейин вафот этган. У уч ёшли укаси билан исинишга уриниб, кўрпа-тўшакка ўраниб ётган. Марҳумнинг оиласи боланинг совқотишдан вафот этганига ишонмоқда.
Боланинг онаси Жефферсон округ судига мурожаат қилди. Ҳужжатда энергетика компаниялари «даромадни инсон фаровонлигидан устун қўйиши» таъкидланади.
«Об-ҳавонинг даҳшатли прогнози ва тизим тайёр эмаслигини билганига қарамай, ERCOT ва Entergy Corporation инқирозга қарши учун ҳеч қандай эҳтиёт чораларни кўрмади», — дейилади даъвода.
21 февраль ҳолатига кўра, ноодатий совуқ об-ҳаво туфайли Техасда 30 дан ортиқ одам вафот этди. Улар орасида кўпчилик электр узилган пайтда исиниш учун машина ёки генераторлардан фойдалангани сабабли ис газидан заҳарланиб вафот этган, дейилади хабарда.
Бузбининг айтишича, ҳозирда адвокат оғир об-ҳаво шароитида яқинларини йўқотган еттита оилага вакиллик қилмоқда ва энергетика компанияларига қарши ҳали янада кўпроқ даъволар берилади.
«Кристиан (вафот этган 11 ёшли бола)нинг даъвоси биринчи бўлди ва бу фақат бошланиши, холос. Унинг даъвоси Техасни ўзгартиради. Болани худо ярлақасин», — дея сўзларини якунлади адвокат.
АҚШ президенти Жо Байден кучли қор ёғиши ва аномал совуқ ҳаво туфайли Техасни табиий офат ҳудуди деб эълон қилган. Шу муносабат билан у штат аҳолисига ёрдам бериш учун федерал бюджетдан маблағ ажратишга буйруқ берган.
The New York Times маълумотларига кўра, АҚШ жанубидаги аномал совуқ ҳаво ва кучли қор оқибатида камида 58 киши ҳалок бўлган, уларнинг кўпчилиги Техас штатида.
Bloomberg АҚШда рекорд даражадаги совуқ шамол электростанциялари ва қуёш батареяларининг ишдан чиқишига олиб келгани, бу эса электр энергияси ва газ нархларининг кўтарилишига сабаб бўлгани ҳақида хабар берган. Техас электр тармоғи операторининг айтишича, электр қуввати танқислиги электр станцияларида табиий газ етишмаслиги ва музлаш туфайли шамол электр станцияларининг тўхтаб қолиши билан боғлиқ.
Эслатиб ўтамиз, 15 февраль куни АҚШнинг 24 та шаҳрида ҳаво ҳарорати рекорд даражада пасайган. Техасда миллиондан ортиқ аҳоли совуқ ҳаво ва бўрон сабабли чироқсиз қолган.
Изоҳ (0)