Бутун дунё бўйлаб турли мамлакатларда коронавирусга қарши эмланганлар сони 200 миллион кишидан ошди. Бу ҳақда «ТАСС» хабар берди.
20 февраль ҳолатига кўра, 200 269 332 киши эмланган, бу бутун сайёра аҳолисининг 2,6 фоизи демакдир. Шу билан бирга, АҚШ, Хитой, Буюк Британия ва Ҳиндистон ҳиссасига барча эмланганларнинг қарийб 65 фоизи тўғри келади.
АҚШда 60 миллион киши — аҳолининг 18,5 фоизи эмланган бўлса, Хитойда 40,5 миллион (3%) киши вакцина олган. Буюк Британияда денгизорти ҳудудлари, Норманд ороллари ва Мен оролини ҳисобга олганда, 17,5 миллиондан ортиқ одам эмланган, бу аҳолининг 26,4 фоизига тенг. Ҳиндистонда эса вакцина олганлар сони 10,7 миллион кишини ташкил қилмоқда (1%).
Айни пайтда эмланган аҳолининг энг катта улуши Исроилда (80,3%), БААда (49,8%) ва Сейшел оролларида (56,8%) қайд этилди.
Таъкидланишича, эмлаш суръатлари пасайган. Ўтган ҳафта кунига ўртача 6 миллион киши эмланган бўлса, шу ҳафта бу кўрсаткич 5 миллионга тушиб қолди.
Пандемия бошидан буён коронавирусга чалинганлар сони эса 111 миллион кишига етган, уларнинг 2,4 миллиондан ортиғи вафот этиб, 86 миллиондан зиёди соғайган.
Аввалроқ ривожланган давлатлар коронавирусга қарши вакциналарни ўз эҳтиёжларидан ортиқ ҳажмда сотиб олаётгани ҳақида камбағаллик ва касалликларга қарши курашиш ташкилоти ONE Campaign маълум қилган эди. Айни пайтгача АҚШ, Европа Иттифоқи, Австралия, Канада ва Япония 3 миллиард доза коронавирусга қарши вакцина сотиб олган, бу ушбу мамлакатлар аҳолисини эмлаш учун керагидан 1 миллиард дозага ортиқ ҳисобланади.
Изоҳ (0)