Butun dunyo bo‘ylab turli mamlakatlarda koronavirusga qarshi emlanganlar soni 200 million kishidan oshdi. Bu haqda “TASS” xabar berdi.
20-fevral holatiga ko‘ra, 200 269 332 kishi emlangan, bu butun sayyora aholisining 2,6 foizi demakdir. Shu bilan birga, AQSh, Xitoy, Buyuk Britaniya va Hindiston hissasiga barcha emlanganlarning qariyb 65 foizi to‘g‘ri keladi.
AQShda 60 million kishi — aholining 18,5 foizi emlangan bo‘lsa, Xitoyda 40,5 million (3%) kishi vaksina olgan. Buyuk Britaniyada dengizorti hududlari, Normand orollari va Men orolini hisobga olganda, 17,5 milliondan ortiq odam emlangan, bu aholining 26,4 foiziga teng. Hindistonda esa vaksina olganlar soni 10,7 million kishini tashkil qilmoqda (1%).
Ayni paytda emlangan aholining eng katta ulushi Isroilda (80,3%), BAAda (49,8%) va Seyshel orollarida (56,8%) qayd etildi.
Ta’kidlanishicha, emlash sur’atlari pasaygan. O‘tgan hafta kuniga o‘rtacha 6 million kishi emlangan bo‘lsa, shu hafta bu ko‘rsatkich 5 millionga tushib qoldi.
Pandemiya boshidan buyon koronavirusga chalinganlar soni esa 111 million kishiga yetgan, ularning 2,4 milliondan ortig‘i vafot etib, 86 milliondan ziyodi sog‘aygan.
Avvalroq rivojlangan davlatlar koronavirusga qarshi vaksinalarni o‘z ehtiyojlaridan ortiq hajmda sotib olayotgani haqida kambag‘allik va kasalliklarga qarshi kurashish tashkiloti ONE Campaign ma’lum qilgan edi. Ayni paytgacha AQSh, Yevropa Ittifoqi, Avstraliya, Kanada va Yaponiya 3 milliard doza koronavirusga qarshi vaksina sotib olgan, bu ushbu mamlakatlar aholisini emlash uchun keragidan 1 milliard dozaga ortiq hisoblanadi.
Izoh (0)