Қирғизистон президенти Садир Жапаров мамлакатда расмий тиллардан бири, шунингдек, миллатлараро мулоқот тили бўлган рус тилининг мақомини ўзгартиришга қаратилган ҳар қандай уринишларга қарши чиқади. Бу ҳақда Жапаровнинг ўзи «Қирғизистон сўзи» газетасида чоп этилган «Иттифоқдошлик алоқалари» мақоласида маълум қилди, деб ёзади «РБК».
«Рус тили — мамлакатда нафақат расмий тил, балки миллатлараро мулоқот тили ҳамдир. Мен президент ҳамда инсон ва фуқаро ҳуқуқ, эркинликлари кафили сифатида бу масалада ҳар қандай сиёсий манипуляцияларга уринишларга қатъиян қаршиман», — деб ёзди Жапаров.
Унинг эслатишича, рус тилининг мақоми Қирғизистон конституциясида мустаҳкамлаб қўйилган. Шунингдек, президентнинг таъкидлашича, бу тил замонавий адабиёт, маданиятни тушунишда чексиз имкониятларни очиб беради.
Бундан ташқари, Жапаров ўз мақоласида ёзишича, Россия билан алоқаларни иттифоқдошлик ва стратегик шерикликнинг энг юқори даражасига чиқариш Қирғизистон миллий манфаатларига жавоб беради. «Ушбу йўналишга республика ташқи сиёсатида асосий жой ажратилади», — дея қўшиб қўйди у.
Ноябрда Қирғизистон Конституциявий кенгаши аъзоси Садирдин Тўралиев мамлакатда рус тилининг расмий мақомини бекор қилиш таклифи билан чиққанди. Бунга Қирғизистон ёшлари ўз она тилида гаплашмай қўйганини сабаб қилиб кўрсатган. Аммо кейинроқ Конституциявий кенгаш рус тили расмий тил сифатида қолдирилишини маълум қилди.
Эслатиб ўтамиз, Садир Жапаров 10 январь куни ўтказилган Қирғизистон президенти сайловида салкам 80 фоиз овоз олиб ғалаба қозонди. Шундан кейин у Қирғизистонда рус тили ўзининг расмий тил мақомини сақлаб қолишига ваъда берди.
Садир Жапаров Россияни кўп маротаба мамлакатнинг асосий стратегик шериги деб атаган. Сайловларда ғолиб чиққанидан кейин кўп ўтмай, у илк чет эл сафарини Россияга амалга оширишини билдирганди. 15 февраль куни Жапаров Россияга ташриф учун тайёргарлик доирасида ўз-ўзини яккалаш режимига ўтгани хабар берилди.
Қирғизистон Миллий статистика қўмитаси маълумотларига кўра, 2020 йилда руслар республикада миллий гуруҳ сифатида сон бўйича қирғизлар ва ўзбеклардан кейинги ўринни эгаллаган. 6,5 миллион аҳолининг қарийб 345 минг нафарини руслар ташкил этади.
Изоҳ (0)