Японияда яна бир ер силкиниши қайд этилди. Зилзиладан жабрланганлар сони 150 кишига етди

Япония шимоли-шарқида, Фукусима префектураси ҳудудида 5,2 магнитудали яна бир зилзила содир бўлди, деб ёзади «РБК» Япония метеорология агентлигига таяниб.

Унинг маълумотларига кўра, ер силкинишлари маҳаллий вақт билан 14 февраль, якшанба куни соат 16:31 (Тошкент вақти билан соат 12:31)да қайд этилган. Зилзила ўчоғи 50 км чуқурликда сув остида жойлашган. Соат 16:59 (12:59)да Фукусима яқинида 4,3 магнитудали яна бошқа зилзила кузатилди.

Японияда зилзиладан жабрланганлар сони 150 кишига етди, 950 мингга яқин уй хўжаликлари электр қувватисиз қолди.

Дастлабки 7,3 магнитудали зилзила 13 февраль, шанба куни соат 23:08 да (Тошкент вақти билан соат 19:08) Тинч океанидаги Фукусима префектураси ҳудудида юз берганди. Зилзила ўчоғи 55 км чуқурликда жойлашди, ер силкинишлари Токиода ҳам сезилди.

Ушбу зилзила мамлакат шимоли-шарқида, шунингдек, пойтахт Токиода ҳам сезилди. Ер ости силкинишлари цунамига олиб келмади. Кейинроқ Японияда кичикроқ кўламдаги кетма-кет афтершоклар қайд этилди.

Зилзила туфайли «Фукусима-2» атом электр станциясида ишлатилиб бўлган ядро ёқилғисини сақлаш учун мўлжалланган ҳавзадан радиоактив сувнинг бир қисми сочилиб чиқди. Натижада ҳукумат унинг энергоблокларининг бир қисмидан фойдаланишни тўхтатишга қарор қилди. Уларнинг ахборотига кўра, сачраб чиққан сув ҳажми катта бўлмаган ва ҳодиса ядро ёқилғисини совитиш жараёнига таъсир қилмаган.

Япония миллий метеорологик бошқармаси вакили тахмин қилишича, ҳодиса 2011 йилги вайронкор зилзила оқибати бўлиши мумкин. Бу ҳақда Токио университети Зилзилаларни тадқиқ қилиш институти профессори Кенжи Сатаке ҳам айтиб ўтди. Унинг сўзларига кўра, «ўн йилдан кейин бундай кўламдаги афтершок юз бериши ажабланарли эмас».

Бунда гап 2011 йил март ойида Япониянинг Хонсю ороли шарқий қирғоқларида содир бўлган ва цунамига олиб келган 9,0 магнитудали зилзила ҳақида бормоқда. Табиий офат оқибатида 25,9 минг киши ҳалок бўлган.

Сейсмологлар огоҳлантиришича, яқин ҳафталар ичида қайтадан кучли ер ости силкинишлари содир бўлиши мумкин. Япония бош вазири Ёсихиде Суга мамлакат фуқароларига уйда қолишни тавсия қилди.