Наманганда ҳаракат хавфсизлигини таъминлай олмаган Damas ҳайдовчиси 40 ёшли пиёдани уриб юборди. Бу ҳақда вилоят ИИБ ахборот хизмати хабар берди.
Маълум қилинишича, 10 февраль куни соат 12:10 ларда Косонсой—Исковот йўлининг 14-километрида автомашинани ишонч қоғози билан бошқариб кетаётган ҳайдовчи ҳаракат хавфсизлигини таъминлай олмай йўлнинг чап томонига бурилаётиб, ҳаракат йўналишига нисбатан йўлнинг ўнг томонида турган пиёдани уриб юборган. Жабрланувчи Янгиқўрғон туманида яшовчи, 1981 йилда туғилган фуқаро бўлган.
Пиёда оғир тан жароҳати олиб, шифохонада вафот этган.
Ушбу ҳолат бўйича Янгиқўрғон туман ИИБ ҳузуридаги Тергов бўлими томонидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.
Аввалроқ Фарғона вилоятининг Учкўприк туманида Lacetti йўлни кесиб ўтаётган аёлни уриб кетгани, Сирдарёда Gentra йўлни белгиланмаган жойдан кесиб ўтаётган маст эркакни уриб кетгани ҳақида хабар берилган эди. Ҳар икки пиёда воқеа жойида вафот этган.
Изоҳ (0)