«Ўзбекистонда ойига 500 доллар топиш учун ё кунига 20 соатлаб ишлаш, ёки бировнинг ҳаққини ейиш керак». Россияда ишлаётган 19 ёшли муҳожир йигит ҳикояси

«Дарё» «Муҳожирлар ҳаёти» лойиҳаси доирасида хорижда меҳнат қилаётган ўзбекистонликларнинг ҳаётини ёритишда давом этади. Бу галги қаҳрамонимиз — Россияда ишлаётган 19 ёшли муҳожир йигит.

Исмим Шоҳрух, 19 ёшдаман. Сурхондарё вилояти Термиз туманида туғилганман. Ҳозир Москвада ишлайман. Тўғрисини айтсам, Россияга бошқа мигрантлар каби бирор етишмовчиликдан эмас, шунчаки Ўзбекистонда бекорчиликдан зерикиб, ишлашга келганман.

Яхши ойлик олиш учун университетда ўқиш керак

Янада очиқроқ айтадиган бўлсам, 2019 йилда 11-синфни битириб, университетга ўқишга топширдим, лекин киролмадим. Кейин Кореяга ишга кетмоқчи бўлдим. Корейс тилини ўрганишни бошладим. Бир муддат вақт ўтиб, хорижга ишга жўнатадиган ташкилотда тилдан имтиҳон топширдим. Афсуски, яна омадим кулмади, тестдан ўтолмай, шу ерда қолдим.

Ўзимизда ишлолмадим, чунки ойлик кам. Яхши маош олиш учун эса тўрт йил университетда ва яна икки йил магистратурада ўқиш керак. Бўлмаса, «нормальний» иш ҳам топиш жуда қийин.

Хуллас, Ўзбекистонда 10 ойча ишсиз юрдим. Бундай юришимдан фойда йўқ эди.

Россияда эса кўп танишларим ишларди. Кейинги корейс тили имтиҳонига қадар бироз маблағ йиғиб олиш ниятида Москвага келдим.

Яшаш шароитимиз яхши, бир хонада 8 киши яшаймиз

Москвадаги танишим боргунимча иш ва жой топиб қўйганди. Шунинг учунми, билмадим, бу ерда бошқалардай қийинчиликка дуч келмадим. Дастлаб олти ой давомида гул етиштириладиган иссиқхонада ишладим. Ишим яхши эди, лекин турар жойлари... Хуллас, бошқа иш топишга тўғри келди.

Ҳозир қурилишда патент тўлаб, қонуний ишлаяпман. Иш вақтимиз соат 8:00 дан 19:00 гача. Икки ҳафтада бир кун дам олишга рухсат бор. Маошим ойига 400-500 доллар атрофида.

Ишхонамизнинг ётоқхонасида тураман. Шунинг учун ижарага пул тўламайман. Яшаш шароитимиз яхши. Битта хонада саккиз киши яшаймиз. Уч маҳал овқат ҳам беради. Овқатлар жуда зўр бўлмаса ҳам, қоринни алдайди.

Юртдошларимиз орасида кўча супурувчилари ҳам бор

Россиядаги Ўзбекистон элчихонасига ҳеч ҳам ишим тушмаган, тушмасин ҳам. Лекин юртдошларимизнинг у ерга бориб, шовқин кўтарган видеоларини кўрганман. Менимча, агар ўзбекистонликлар бу ташкилотнинг кўмагини ҳис қилганда, бундай видеолар тарқалмасди деб ўйлайман.

Ҳозир ишлаётган жойимизда ўзбеклар жуда кўп. Улар асосан қурилишда, музлаткичли омборхоналарда, дўконларда ишлайди. Ҳатто кўча супурадиганлари ҳам бор.

Русларнинг бизга нисбатан муомаласига келсак, жуда ҳурмат ҳам қилмайди, жуда ёмон муносабатда ҳам бўлмайди.

Яқинларимни охирги манзилига кузатолмадим

Мусофирчиликда юриб кўп нарсани тушундим. Қарашларим ўзгарди. Оиламдагиларни, умуман, ҳаммани вақтида, фурсат борида қадрлашни ўргандим. Чунки Россиядалигимда Ўзбекистондаги кўп яқинларим вафот этди. Лекин узоқдалигим учун уларни охирги манзилига кузатолмадим. Тўғри, бу қисмат ҳамманинг бошида бор. Ҳаммамиз келиб-кетгувчимиз, аммо барибир ўз вазифамни адо этишим керак эди.

Ўзбекистонда ойига 400-500 доллар топиб бўлмайди

Балки мумкиндир, лекин бунинг учун ё кунига 20 соатлаб ишлаш, ёки бировнинг ҳаққини ейиш керак. Бироқ бу менинг эътиқодимга тўғри келмайди. Эртага жавоби ҳам бор.

Тўғри, тадбиркорлик қилиб шунча пул ишлаш мумкиндир, лекин бошлаш учун ҳам анчагина маблағ керак. Шу сабабли ҳам кўп ўзбеклар чет элга чиқиб кетган.

Агар Россиядаги пулимнинг ярмини Ўзбекистондан топганимда эди, ҳозироқ Сурхондарёга қайтардим.

Энг катта ниятим — онамни ҳажга юбориш

Уч акам, уч опам бор. Ҳаммаси уйли-жойли бўлиб кетган. Аллоҳга шукр, бирор етишмовчилик йўқ. Аммо одам пул топгандан кейин унинг истаклари ҳам кўпайиб боравераркан. Энг катта ниятим — онамни ҳажга юбориш. Кейин уйимизни таъмирлашни, машина олишни режалаштиряпман.

Иншааллоҳ, Ўзбекистонга қайтсам, университетга ўқишга топшираман. Агар ўтолмасам, яна Кореяга ҳаракат қилиб кўраман.

Хонзодабегим Аъзамова суҳбатлашди.