ДХХ Андижон вилоят бошқармаси ва Бош прокуратура ҳузуридаги департаментнинг ҳудудий бошқармаси ходимлари ҳамкорлигида ўтказилган тезкор тадбирда вилоятдаги болалар мусиқа ва санъат мактабларидан бирининг директори 500 доллар пора олаётганида қўлга олинди. Бу ҳақда «Дарё» мухбири Умиджон Мамарасулов хабар берди.
Таъкидланишича, болалар мусиқа ва санъат мактаби директори B.С. фуқаро Р.Д.дан унинг фарзанди А.А. номига ўзи раҳбарлик қилаётган мактабда ўқиганлиги тўғрисида гувоҳнома тайёрлаб бериш эвазига 200 доллар ҳамда вилоятдаги санъат коллежида юқори лавозимда ишловчи танишлари орқали А.А.ни коллежга ўқишга киритиб қўйиши эвазига 300 доллар талаб қилган.
Ўтказилган тезкор тадбир давомида B.С. 500 долларни хизмат хонасида олаётган вақтида ашёвий далиллар билан ушланган.
Ҳозирда мазкур ҳолат юзасидан Жиноят кодексининг 28-моддаси (жиноят иштирокчиларининг турлари), 211-моддаси (пора бериш) ва 168-моддаси (фирибгарлик), 210-модда (пора олиш) билан жиноят иши қўзғатилган бўлиб, тергов-суриштирув ҳаракатлари амалга оширилмоқда.
Изоҳ (0)