Федерал штатлар бош вазирлари ва Германия канцлери Ангела Меркель мамлакатдаги карантин чекловларини 7 мартга қадар узайтиришга келишиб олди. Бу ҳақда «РБК» хабар берди.
Видеоконференция кўринишида ўтказилган йиғилишда расмийлар пандемия шароитида чекловларни юмшатишга эрта, деган хулосага келди. Шунга қарамай, бир қанча юмшатишлар ҳам жорий этилади.
Таъкидланишича, чекловлар муддатини узайтириш тўғрисидаги қарор канцлер томонидан «бир қатор федерал штатларнинг қаршиликларига қарамай» қабул қилинган. Аввалроқ Меркель карантин чораларини 14 мартгача узайтиришни талаб қилган эди. Рухсат берилган юмшатишлар ичида сартарошхоналар фаолияти ҳам бор, улар 1 мартдан иш фаолиятини бошлаши мумкин.
Германияда қатъий карантин чоралари 2020 йил декабрь ойида жорий қилинган эди. Озиқ-овқат ва кичик хўжалик дўконлари, дорихона, оптика, банклар, газета дўконлари, почта бўлимлари, ветеринария дўконлари ва тиббиёт муассасаларидан ташқари, барча ташкилотларнинг фаолияти тўхтатилди.
Мактаб ўқувчилари дарсларга бормайди, таълимни масофавий шаклда давом эттиради. Болалар боғчалари фаолияти тўғрисида қарор қабул қилиш ҳудудларга топширилган. Учрашувлар фақат битта хонадон вакиллари бўлган одамлар ва яна қўшимча битта одам ўртасида бўлиши мумкин. Жамоат транспорти ва дўконларда қўлбола тайёрланган ниқоблардан фойдаланиш тақиқланади.
Аввалроқ Германияда локдаун 1 мартгача узайтирилиши мумкинлиги ҳақида хабар берилган эди.
Изоҳ (0)