Andijonda o‘zga shaxs nomiga firma ochib, imtiyozli kreditlarni rasmiylashtirgan va kredit mablag‘larini boshqa maqsadlarga sarflab yuborgan bank xodimlariga jinoyat ishi qo‘zg‘atildi, deya xabar berdi “Daryo” muxbiri Umidjon Mamarasulov.
Ta’kidlanishicha, DXX viloyat boshqarmasi Xonobod shahrida yoshlarga imtiyozli kredit ajratilishini o‘rgangan. Natijada 18-30 yoshdagi yoshlar nomiga firma ochish, imtiyozli kreditlarni rasmiylashtirish hamda kreditlarni boshqa maqsadlarga sarflash, o‘zlashtirish holatlari aniqlangan.
Jumladan, “Xalq banki” Xonobod filiali tomonidan Future Grand Houmes Plus MChJga dam olish maskani tashkil etish uchun jihozlar sotib olish maqsadida 2020-yil 10-dekabrdagi shartnomaga asosan yillik 14 foiz ustama to‘lash sharti bilan 470 million so‘m imtiyozli kredit mablag‘i ajratilgan. Ushbu mablag‘lar kredit shartnomasiga asosan bank filiali tomonidan Center Comp, “Muslimaxon Imkon Invest” hamda Tech smart zone MChJlarga jihozlar sotib olish uchun o‘tkazilgan.
O‘rganishlar davomida bank tomonidan taqdim etilgan mijozning kredit yig‘ma jildida Future Grand Houmes Plus MChJning balansida bino-inshootlar mavjudligi yoki biror-bir bino inshootni dam olish maskani tashkil etish uchun ijaraga olgani to‘g‘risida hujjatlar mavjud emasligi ma’lum bo‘lgan. Shuningdek, kredit ajratishdan oldingi bank tomonidan o‘tkaziladigan dastlabki monitoring hamda kredit ajratilgandan so‘ng maqsadli ishlatishi bo‘yicha monitoring dalolatnomalari belgilangan tartibda rasmiylashtirilmaganligi aniqlangan. Qolaversa, jamiyatga ajratilgan 470 million so‘m mablag‘ uchun ta’minotchi korxonalar bilan tuzilgan oldi-sotdi shartnomalar, haqiqatda mahsulot yetkazib berilganini tasdiqlovchi hisob-varaq fakturalar mavjud bo‘lmasa-da, bank mansabdor shaxslari tomonidan yuqoridagi korxonalarga mablag‘lar o‘tkazib berilgan.
Mablag‘ning maqsadli ishlatilishi joyiga borib ko‘rilganda Future Grand Houmes Plus MChJ rahbari “O‘zsanoatqurilishbank” ATB Xonobod filiali kompyuterlashtirish xizmati bosh mutaxassisi Farruh Ubaydullayevning nomidan ushbu bankning boshqaruvchi o‘rinbosari Jasur Mamajonov kredit mablag‘larini talon-toroj qilgani aniqlangan.
Jasur Mamajonovdan olingan mahsulotlar to‘g‘risida so‘ralganda boshqa shaxsga tegishli bo‘lgan choyxona binolarini ko‘rsatgan.
Holat yuzasidan Andijon viloyati prokuraturasi tomonidan “Xalq banki” Xonobod filiali mansabdor shaxslari va boshqalarga nisbatan Jinoyat kodeksining 167-moddasi 3-qismi “a” bandi (juda ko‘p miqdorda o‘zlashtirish yoki rastrata yo‘li bilan talon-toroj qilish) va 209-moddasi 2-qismi “a” bandi (mansab soxtakorligi) bilan jinoyat ishi qo‘zg‘atilgan.
Hozirda holat yuzasidan tergov xarakatlari olib borilmoqda.
Izoh (0)