Шавкат Мирзиёев ва Афғонистон президенти билан «Сурхон—Пули-Хумри» электр узатиш линиясини қуриш лойиҳасини амалга оширишни жадаллаштиришга келишди

Шавкат Мирзиёев 10 февраль куни Афғонистон президенти Ашраф Ғани билан телефон орқали мулоқот қилди. Президент матбуот хизматининг хабар беришича, мулоқот давомида Икки томонлама муносабатлар ва минтақавий ҳамкорликнинг долзарб масалалари кўриб чиқилди.

Хусусан, президентлар саъй-ҳаракатларни бирлаштириб, янги «Сурхон—Пули-Хумри» электр узатиш линиясини барпо этиш лойиҳасини амалга оширишни жадаллаштиришга келишиб олди. Шу мақсадда режалаштирилган ишларнинг бажарилишини мувофиқлаштиришнинг икки томонлама механизми яратилади, унинг доирасида ҳар ой видеоанжуманлар ўтказиб борилади.

Шунингдек, кўп қиррали Ўзбекистон—Афғонистон муносабатларини, шу жумладан, нефть-газ тармоғида, таълим соҳасида, техник ихтисосликлар бўйича малакали афғонистонлик кадрларни тайёрлаш борасида кенгайтириш имкониятлари кўриб чиқилди.

Давлат раҳбарлари Ўзбекистон, Афғонистон ва Покистон ҳамда етакчи халқаро молиявий институтларнинг юқори даражадаги вакиллари иштирокида ўтган трансафғон транспорт йўлагини қуриш лойиҳасини илгари суриш бўйича уч томонлама ишчи гуруҳнинг биринчи йиғилиши муваффақиятли бўлганини қайд этди. Ушбу лойиҳани амалга оширишни, шу жумладан, техник ҳужжатларни тайёрлашни ва қурилиш ишларини бошлаш муҳим экани таъкидланди.

Буюк шоир ва мутафаккир Алишер Навоий таваллудининг 580 йиллигига бағишлаб 2021 йил март ойида Ҳирот шаҳрида ўтказиладиган байрам тадбирларида Ўзбекистон делегацияси иштирок этиши юзасидан келишувга эришилди. Бўлажак олий ва юқори даражадаги тадбирлар ва мулоқотлар режаси юзасидан ҳам фикр алмашилди.

Ашраф Ғани Афғонистонда тинчлик ва барқарорликни таъминлаш, ушбу мамлакат иқтисодиётини тиклаш масалаларида кўрсатилаётган ҳар томонлама кўмак учун давлат раҳбарига Афғонистон халқи номидан миннатдорлик билдирди.

Эслатиб ўтамиз, 2020 йил 20 октябрида Кобулда Ўзбекистон делегацияси иштирокида Афғонистон ва Осиё тараққиёт банки ўртасида 110 миллион доллар ажратишни назарда тутувчи «Сурхон—Пули-Хумри» электр узатиш линияси қуриш лойиҳасини молиялаштириш тўғрисида битим имзоланганди.

«Ўзбекэнерго» Афғонистонга электр энергияси етказиб беришни кўпайтириш мақсадида «Сурхон—Пули-Хумри» электр узатиш линиясини қуришга 2018 йилда киришган эди. 260 километр узунликдаги линия Афғонистонга электр энергияси етказиб беришни 70 фоизга — йилига 6 миллиард киловатт-соатгача кўпайтириш имконини беради. Лойиҳани амалга ошириш муддати 2020 йил охиригача этиб белгиланганди.

Ўзбекистон 2002 йилдан бери Афғонистонга мунтазам равишда электр энергияси етказиб келади. Ўтган вақт мобайнида экспорт қилинаётган электр энергиясининг йиллик ҳажми 62 миллион киловатт-соатдан жорий йил якуни билан кутилаётган салкам 2,6 миллиардгача кўпайди. Бироқ шу пайтгача етказиб бериш шартномалари фақат йиллик тузиб келинган. 2019 йилнинг сентябрида Ўзбекистон Афғонистон компанияси билан электр энергияси етказиб бериш бўйича 10 йиллик шартнома имзолади.