Бухоро шаҳрида уч нафар вояга етмаган ўсмирни бошқарувидаги автомашинада уриб юбориб, воқеа жойидан қочган ҳайдовчи кузатув камералари орқали қўлга олинди. Бу ҳақда «Дарё»га вилоят ИИБ ЙҲХБ матбуот гуруҳи раҳбари Улуғбек Шукруллаев хабар берди.
Таъкидланишича, 2021 йилнинг 2 февраль куни Бухоро шаҳридаги Алпомиш кўчасида кеч соат 19:00 да ЙТҲ содир бўлган. Воқеага кўра, Matiz ҳайдовчиси аҳоли серқатнов ҳудудда юқори тезликда ҳаракатланиб, пиёдалар йўлакчасидан ўтаётган уч нафар болага йўл бермай, уларни уриб юборган. Оқибатда болаларга енгил тан жароҳати етказган ҳайдовчи уларга кўмак бериш ўрнига воқеа жойидан қочиб кетган.
Воқеадан сўнг кўп ўтмай, Бухоро олимпия захиралари спорт мактаби ўқитувчиси ўз ўқувчиларининг автотранспорт ҳодисасига дуч келишгани, бироқ ҳайдовчи воқеа жойидан қочиб кетгани ҳақида шаҳар ИИБ Йўл ҳаракати хавфсизлиги бўлимига мурожаат қилган. Зудлик билан тезкор гуруҳ дастлабки суриштирув ишларини олиб борган. Шаҳардаги видеокузатув камералари орқали йўл транспорт ҳодисасини содир этиб, воқеа жойидан қочиб кетган ҳайдовчи 32 ёшли фуқаро А.Ж. эканлигига аниқлик киритилган.
Дастлабки суриштирувларга кўра, қўрққанидан қочиб кетганини рўкач қилган фуқаронинг автомашинаси вақтинчалик жарима майдончасига қўйилган. Унга нисбатан Маъмурий жавобгарлик тўғрисидаги кодекси 137-моддаси (йўл-транспорт ҳодисаси юз берган жойдан кетиб қолиш) қўлланилган. Ушбу моддага кўра, жавобгарга нисбатан базавий ҳисоблаш миқдорининг ўттиз баравари миқдорида жарима солишга ёки транспорт воситаларини бошқариш ҳуқуқидан икки йил муддатга маҳрум этишга ёхуд ўн беш суткагача муддатга маъмурий қамоққа олишга сабаб бўлади.
Изоҳ (0)