Ўзбекистонда гипофизар миттилик касаллигига чалинганлар (лилипутлар) ва гавда тузилишида мутаносиблик бузилган паканалар, эркаклар иш стажи камида 20 йил ва аёллар иш стажи камида 15 йил бўлган тақдирда умумий пенсияга чиқиш ёшини 15 йилга қисқартирган ҳолда имтиёзли равишда пенсия олиш ҳуқуқига эга.
Бу ҳақда «Фуқароларнинг давлат пенсия таъминоти тўғрисида»ги қонуннинг 13-моддасида белгилаб қўйилган. Унга кўра, бундай касалликка чалинган эркаклар 42 ёшдан, аёллар 25 ёшдан пенсия олиш ҳуқуқига эга.
Пенсия жамғармасининг маълум қилишича, бугунги кунда миттилик касалига чалинган 42 нафар фуқарога (шундан: эркаклар 17 нафар, аёллар 25 нафар) умумий белгиланган пенсия ёшидан 15 йил олдин имтиёзли пенсия тайинланиб тўланмоқда.
Бундай фуқаролар сони Тошкент шаҳрида 9 нафар, Бухоро вилоятида 7 нафар, Наманган ва Фарғона вилояти 5 нафар, Андижон вилоятида 4 нафар, Самарқанд ва Хоразм вилоятида 3 нафар, Сурхондарё ва Тошкент вилоятида 2 нафар ҳамда бир нафардан Жиззах ва Сирдарё вилоятларида ташкил этади.
Қонуннинг 7-модасида, умумий асосларда ёшга доир пенсия олиш ҳуқуқига эркаклар 60 ёшга тўлганда иш стажи камида 25 йил ва аёллар 55 ёшга тўлганда иш стажи камида 20 йил бўлган тақдирда эга бўлиши назарда тутилган.
Молия вазирлиги ҳузуридаги бюджетдан ташқари Пенсия жамғармасининг ҳудудий туман (шаҳар) бўлимларида ҳисобга олинган пенсия ва нафақа олувчиларнинг умумий сони 2021 йил январь ойида 3 миллион 824 минг кишини, яъни аҳоли сонидаги улуши 11,2 фоизни ташкил қилди. Ушбу кўрсаткич 2020 йил 1 январь ҳолатига нисбатан 147,2 минг нафар ёки 4 фоизга кўпайган.
Изоҳ (0)