WP: Trampning saylovlar haqidagi bayonotlari va 6-yanvardagi tartibsizliklar AQSh g‘aznasiga 519 mln dollarga tushgan

AQSh prezidenti Donald Trampning noyabrdagi saylovlar haqidagi bayonotlari AQSh g‘aznasiga 519 million dollarga tushdi, deb yozadi “Kommersant” The Washington Post hisob-kitoblariga tayanib.

Ushbu bayonotlar millionlab amerikaliklarni chalg‘itib, saylov tizimiga bo‘lgan ishonchni barbod qildi, tartibsizliklarni keltirib chiqardi, endi esa soliq to‘lovchilar bularning barchasi uchun to‘lashiga to‘g‘ri kelyapti, deb yozadi WP.

Xarajatlar kundan kunga o‘sib borgan, chunki barcha darajalardagi hukumat idoralari Tramp va uning tarafdorlari tomonidan amalga oshirilgan xatti-harakatlarga javob berish uchun mablag‘ ajratishga majbur bo‘lgan. Chiqimlar o‘nlab sud da’volari sababli kelib chiqqan sud xarajatlarini, saylov uchastkalari xodimlariga qaratilgan tahdidlarga javoban xavfsizlikning kuchaytirilishini hamda Kapitoliydagi tartibsizliklardan keyingi ta’mirlash ishlarini o‘z ichiga oladi. Shular tufayli Vashington ko‘chalariga minglab Milliy gvardiya askarlari chiqdi, bu ham katta xarajatlarga sabab bo‘ldi.

Umumiy qiymatning 480 million dollardan ortig‘i Qurolli kuchlarning o‘z qo‘shinlarini mart o‘rtalarigacha Vashingtonga joylashtirishiga ketadigan xarajatlardir. Shu bilan birga, prezidentning saylovlarni tan olishdan bosh tortishining moliyaviy oqibatlari shu paytgacha rasmiylashtirilganidan ancha kattaroq bo‘lishi va haqiqiy chiqimlar noma’lum qolishi mumkin.

Eslatib o‘tamiz, 6-yanvar kuni sobiq prezident Donald Trampning tarafdorlari Kongress Jo Baydenning prezident saylovidagi g‘alabasini tasdiqlayotgan paytda Kapitoliyga bostirib kirgan edi. Majlis to‘xtatilgan, ammo 7-yanvar kuni kongressmenlar Jo Baydenning g‘alabasini tasdiqlagan edi.