Олмалиқнинг ОКМК футбол клуби ўз сафини бир қатор футболчилари билан тўлдириб олди.
Жамоа матбуот хизматининг маълум қилишича, олмалиқликлар сафига ҳимоячилар Шоҳруҳ Гадоев ва Акром Комилов келиб қўшилди.
Озарбайжоннинг «Кешла» клубидан эркин агент мақомида ОКМКга келган Гадоев жамоа билан 2021 йил якунига қадар мўлжалланган шартнома имзолади.
«Пахтакор» вакили Акром Комилов эса ижара асосида йил охиригача «кончилар» либосини ҳимоя қилади.
29 ёшли Гадоев профессионал фаолияти давомида «Насаф», «Ал-Муҳаррак» (Баҳрайн), «Бунёдкор», «Бухоро» ва «Тежон» (Жанубий Корея) каби клубларда ҳам тўп сурган.
24 ёшли Комилов эса шу вақтга қадар «Бунёдкор» ва «Пахтакор»да ҳаракат қилган.
Аввалроқ Миржалол Қосимов қўл остидаги жамоа Саржар Шоаҳмедов, Ботирали Эргашев, Аббос Отахонов, Дилшод Аҳмадалиев, Александр Касян каби футболчиларни ўз сафига қўшиб олганди. Шунингдек, ОКМК бир қатор футболчилари билан шартномани узайтирган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)