Samsung компанияси ўрта даражадаги Galaxy М12 смартфонини расман тақдим этди. Унга HD+ сифатни қўллаб-қувватловчи ва фронтал камера (8 Мп) учун мўлжалланган қирқимга эга 6,5 дюймли Infinity-V дисплейи ўрнатилган, деб хабар беради Hi-Tech.Mail.ru.
Тезкор хотира ҳажми уч хил модификацияга қараб 3, 4 ёки 6 гигабайтни ташкил этади. Ички хотираси мос равишда — 32, 64 ва 128 гигабайт. Хоҳишга қараб microSD’дан ҳам фойдаланиш мумкин.
Процессори ҳақида маълумот берилмаган, бироқ аввалроқ тарқалган инсайдерлик хабарларига кўра, унга Exynos 850 ўрнатилган.
Galaxy М12’нинг асосий ўзига хослиги сиғими 6000 мА/соатга тенг аккумулятори — одатда бу каби сиғимга эга батареялар планшетларга ўрнатилади. Смартфон бир марта қувватланиш орқали 24 соат фаол ишлай олади. Шунингдек, қурилма эскирган microUSB’ни эмас, замонавий USB Type-C’ни қўллаб-қувватлайди.
Бундан ташқари, асосий камеранинг квадрат блоки ва ён томонидаги бармоқ изи сканерини таъкидлаб ўтиш лозим. Смартфон ташқи кўриниши билан Apple’нинг янги линейкасини ёдга солади. Тасвирга олишга мўлжалланган асосий датчик 48 мегапикселга тенг, шунингдек, кенг бурчакли 5 Мп, чуқурликни ўлчовчи ва макромодуль (иккаласи ҳам 2 мегапикселдан) ўрнатилган.
Ҳозирча янги смартфон нархи келтириб ўтилмаган. Ўзидан олдинги Galaxy М11’дан келиб чиқиладиган бўлса, янги модель нархи 130-160 доллар атрофида бўлади.
Изоҳ (0)