Халқ депутатлари Фарғона вилояти кенгашининг 5 февраль куни президент Шавкат Мирзиёев раислигида ўтган сессиясида аҳолини иш билан таъминлаш ва турмуш шароитларини яхшилаш вазифалари белгиланди, дея хабар бермоқда президент матбуот хизмати.
Таъкидланишича, шаҳар ва туманларни маҳаллабай тизимда ривожлантириш мақсадида вилоятдаги 76 та секторнинг ҳар бирида иқтисодий комплекснинг малакали ходимларидан иборат бошқарув офислари ташкил этилади.
«Бу мутахассислар маҳаллага бириктирилган банк ходимлари билан бирга, жойлардаги шароитни ўрганиб, лойиҳаларни шакллантиради ва амалга оширишга кўмаклашади. Зарур бўлса, ишсиз аҳоли, ёшлар ва аёллар касб-ҳунарга ўргатилади», — дейилади расмий ахборотда.
Сессияда Фарғонада 2021—2022 йилларда умумий қиймати 17 триллион сўмлик 949 та инвестиция лойиҳаси амалга оширилиши маълум қилинган. Бунда кимё, тўқимачилик, чарм-пойабзал, қурилиш материаллари, электротехника саноати «драйвер» бўлади.
Хусусан, «Фарғонаазот» компаниясида жами 537 миллион долларлик учта лойиҳа, тўқимачиликда 154 миллион долларлик 14 та лойиҳа амалга оширилади.
Изоҳ (0)