Бухоро вилоятида корхона директори ва бош ҳисобчисининг ноқонуний хатти-ҳаракатлари тасвирланган видеони интернетга тарқатиб юбормаслик учун пул талаб қилган ишчилар қўлга олинди. Бу ҳақда Бош прокуратура «Дарё»га маълум қилди.
Маълум қилинишича, Бош прокуратура ҳузуридаги департамент ҳамда ДХХнинг Бухоро вилояти бошқармалари томонидан ИИБ ходимлари билан ҳамкорликда тезкор тадбир ўтказилган. Тадбир давомида «К» номли корхона ишчилари Ш.Ш., Б.А. ва О.Х. олдиндан тил бириктириб, жамият директори ва бош ҳисобчисини гўёки мансаб ваколатини суиистеъмол қилиб, ноқонуний хатти-ҳаракатлар содир этганлиги акс этган видеоёзувларни интернетда тарқатиш ҳамда бу ҳақда ҳуқуқни муҳофаза қилувчи органларга мурожаат қилиш билан қўрқитиб келгани аниқланган.
Улар ушбу ҳаракатларини амалга оширмаслик эвазига корхона масъулларидан товламачилик йўли билан 30 минг АҚШ доллари талаб қилган. Кимёвий ишлов берилган пулларни олган вақтида ашёвий далил билан ушланган.
Мазкур ҳолат юзасидан Ш.Ш., Б.А. ва О.Х.ларга нисбатан Жиноят кодексининг 165-моддаси (товламачилик) 3-қисми билан жиноят иши қўзғатилган. Ҳозирда тергов ҳаракатлари ўтказилмоқда.
Аввалроқ Тошкентда аёлнинг ярим яланғоч ҳолда рақсга тушгани акс этган видеони интернетда тарқатмаслик учун 50 минг доллар талаб қилган эркак қўлга олингани, Наманганда фуқаронинг ўзга билан жанжаллашгани акс этган видеосини интернетда тарқатмаслик эвазига ундан 100 доллар талаб қилган шахс ушлангани тўғрисида хабар берилганди.
Изоҳ (0)