4 февраль куни Олмаотада Digital Almaty 2021 форуми олдидан Ўзбекистон бош вазири Абдулла Арипов Россия бош вазири Михаил Мишустин билан учрашди, деб хабар бермоқда Россия ҳукумати матбуот хизмати.
Хабарда айтилишича, Ўзбекистон Президентининг давлат ташрифи билан Россияга келишига тайёргарлик кўрилмоқда. Шунингдек, имзолаш учун бир қатор ҳужжатлар тўплами ишлаб чиқилиши, мазмунга бой дастур тайёрланиши айтилган.
«Россия ва Ўзбекистон ҳукумат раҳбарлари даражасида Қўшма комиссиянинг иккинчи йиғилиши давлат ташрифига тайёрлашнинг жуда муҳим босқичи бўлади. Бу икки томонлама ҳамкорликнинг кўлами ва аҳамиятини кўрсатади. Афсуски, санитария-эпидемиологик чекловлар туфайли бизнинг тадбирлар март—апрель ойларига қолдирилди», — дейилади хабарда.
Шунингдек, учрашувда оммавий вакцинация жараёнидаги ўзаро ҳамкорлик қилинаётгани таъкидланган.
Коронавирус пандемиясига қарамай, 2020 йилнинг 11 ойи давомида мамлакатлар ўртасидаги ўзаро товар айланмаси 2019 йилнинг шу даврига нисбатан 17 фоизга ошиб, жами 5,3 миллиард долларни ташкил қилгани қайд этилган.
«Президентлар ўз олдига ушбу кўрсаткични 10 миллиардгача оширишни мақсад қилган. Ўйлайманки, бу борада биз сиз билан қўлдан келганча ҳаракат қиламиз», — деган Михаил Мишустин.
Шавкат Мирзиёев 2021 йилда Россияга давлат ташрифи билан бориши ҳақида Ўзбекистон ташқи ишлар вазири Абдулазиз Комиловнинг 21 декабрь куни россиялик ҳамкасби Сергей Лавров билан учрашувида ҳам айтиб ўтилган.
Бош вазир Абдулла Ариповнинг матбуот хизмати вакили Бекзод Ҳидоятовнинг маълум қилишича, Шавкат Мирзиёевнинг Россияга ташрифи март—апрель ойларида бўлиши кутилаётгани мазмунида хабарлар тарқатилмоқда. У Олмаотада бўлиб ўтган учрашувда Шавкат Мирзиёевнинг Москвага ташрифи эмас, ҳукумат раҳбарлари даражасидаги Қўшма комиссиянинг навбатдаги йиғилишини ўтказиш масаласи муҳокама қилинганини таъкидлаган.
Эслатиб ўтамиз, Шавкат Мирзиёев Россияда охирги марта 2020 йилнинг июнь ойида амалий ташриф билан бўлган эди.
Изоҳ (0)