Самарқандда ўзининг 6 ёшли ўғлини бўғиб ўлдирган отага нисбатан суд ҳукми ўқилди. Бу ҳақда «Ўзбекистон 24» телеканалида хабар қилинди.
Маълум қилинишича, судланувчи Р.Д. турмуш ўртоғи (даъвогар) билан арзимаган нарсалар учун уришиб қолади, шунда аёл аразлаб онасининг уйига кетади, орадан бир оз вақт ўтиб у катта фарзандини ўзи билан олиб кетади. Даъвогар томон бир неча маротаба ўғлини қайтаришни сўраган, судланувчи ўғлини яшириб бошқа ерда яшаб юрган.
Воқеа содир бўлган куни маҳалла масъуллари, профилактика инспектори ва кайвонилар бу оилани яраштириш учун судланувчининг уйига келиши керак эди. Шунда ота ўғли Достон билан уйига қайтади, аммо хотини ва маҳалладагилар келмайди.
Ота шунда фарзанди ва ўзининг жонига қасд қилади. 6 ёшли Достон бўғиб ўлдирилган, аммо ота тирик қолган.
Суд Р.Д.ни Жиноят кодексининг 97-моддаси 2-қисми «в» банди (айбдорга аён бўлган ожиз аҳволдаги шахсни қасддан ўлдириш) билан айбли деб топди ва 17 йил 6 ой муддатга озодликдан маҳрум қилиш жазосини тайинлади.
Аввалроқ Қашқадарёда 27 ёшли эркак ухлаб ётган хотинини пичоқлаб ўлдиргани, Андижонда қўшни аёлни қарз бермагани ва устидан кулгани учун ўлдирган шахс 17,5 йилга қамалгани ҳамда Қашқадарёда маст эркак хотини ва қайнсинглисини пичоқлагани ҳақида хабар берилганди.
Изоҳ (0)