“Azon.uz” bosh muharriri Din ishlari bo‘yicha qo‘mita tomonidan tahririyatga nisbatan bosim o‘tkazilgani va saytda e’lon qilingan ayrim maqolalarni o‘chirishni talab qilingani sababli ishdan bo‘shaganini e’lon qilgandi. Din ishlari bo‘yicha qo‘mita bu xabarni rad etib, bu borada qo‘mita rahbariyati tomonidan hech qanday topshiriq bo‘lmaganini bildirgandi.
Ushbu bayonotga javoban “Azon.uz” uning ta’sischisi Mubashshir Ahmadga unga aloqador bo‘lmagan, axborot resurslarida e’lon qilingan maqolalar yuzasidan Din ishlari bo‘yicha qo‘mita raisi o‘rinbosari Dilshod Eshnayevning haqoratli so‘zlar bilan tahdid qilgani aks etgan telefon suhbati yozib olingani va qo‘ng‘iroq vaqti va davomiyligi saqlab qo‘yilganini ma’lum qildi.
Xabarda aytilishicha, haqiqatda sodir bo‘lgan ushbu holat yuzasidan xabar bermaslikka qaror qilingan bo‘lgan. Ammo Din ishlari bo‘yicha qo‘mitaning 4-fevralda “Azon.uz” bosh muharriri Abdulaziz Muborakning bayonotida keltirilgan voqealar bo‘lmaganligi aytib o‘tilgan munosabatidan so‘ng, shuningdek, uning ta’sischisi Mubashshir Ahmadning Facebook’da onlayn efir orqali chiqishlarini inobatga olib yuqoridagilarni oshkor qilishga qaror qilingan.
Shu sababli “Azon.uz” Din ishlari bo‘yicha qo‘mitadan Dilshod Eshnayev harakatlariga baho berishni va bu haqda jamoatchilikni xabardor qilishni so‘ragan.
Xabarda, shuningdek, “Azon.uz”saytining bosh muharriri Abdulaziz Raimovning tahririyatga nisbatan bosim o‘tkazilgani sababli egallab turgan lavozimidan ozod etish bo‘yicha bergan arizasi qanoatlantirilmagani ham bildirib o‘tilgan.
Izoh (0)