Ўзбекистонда 2020 йилда коронавирус пандемиясига қарамасдан ишлаб чиқариш жараёнларида бахтсиз ҳодисалар ошган. Бу ҳақда Бандлик ва меҳнат муносабатлари вазирлиги Давлат меҳнат инспекциясининг ҳисоботида келтириб ўтилган.
Инспекция маълумотларига кўра, 2020 йил давомида республикада ушбу кўрсаткич 607 тани (107 тага кўпайган) ташкил этган бўлса, 2019 йилда ишлаб чиқариш билан боғлиқ бахтсиз ҳодисалар 500 та бўлган. Бахтсиз ҳодисалар оқибатида 693 нафар ходим жабрланган. Шундан 201 нафар ходим ҳалок бўлган, 457 нафари оғир ва 35 нафари енгил тан жароҳати олган.
Тармоқлар кесимида содир бўлган бахтсиз ҳодисалар:
- Саноатда — 101 та. Оқибатда 23 нафар ходим вафот этган ва 80 нафари оғир тан жароҳати олган;
- Қурилишда — 82 та. Оқибатда 31 нафар ходим вафот этган ва 51 нафари оғир тан жароҳати олган;
- Қишлоқ хўжалигида — 18 та. Оқибатда 12 нафар ходим вафот этган ва 15 нафари оғир тан жароҳати олган.
Қонунбузилиши ҳолатларига йўл қўйгани учун 403 нафар мансабдорга нисбатан 4,149 миллиард сўм миқдорида маъмурий жарималар қўлланилган. 63 та ҳолатда инспекторларнинг тегишли хулосалари асосида айбдор шахслар жиноий жавобгарликка тортилган.
Шунингдек, ҳисоботда маълум қилинишича, республика бўйича касб касаллиги ҳисобида турган беморлар сони 2019 йил 4716 кишини, 2020 йилда эса 4759 кишини ташкил этган. 2020 йилда касб касаллиги аниқланган 43 нафар беморнинг 40 нафари саноатга тўғри келган.
Фуқароларнинг ҳуқуқий онгини ошириш, иш берувчиларга меҳнат тўғрисидаги қонунчилик ҳужжатларининг қўлланилиши юзасидан жами 7065 та тарғибот тадбири ўтказилди. Шундан 1371 та оммавий ахборот воситаси орқали амалга оширилган, 4040 та иш берувчи билан жойларда семинарлар ўтказилди, 1683 маротаба ишонч телефон орқали тушунтиришлар берилган.
Эслатиб ўтамиз, 2021 йилнинг январь ўрталарида Ўзбекистонда 2020 йилги ўлим статистикаси эълон қилинган эди. Унга кўра, пандемия йилида 20 минг «ортиқча ўлим» қайд этилган.
Изоҳ (0)