Ўзбекистонда фаолият олиб бораётган бир қатор қурилиш-пудрат ташкилотлари (девелоперлар) Ўзбекистон қурилиш-пудрат ташкилотлари ассоциациясини тузди. Ассоциация вакилларининг «Дарё»га маълум қилишича, ташкилот 2020 йил 11 декабрь куни Адлия вазирлиги томонидан рўйхатга олинган.
Ассоциацияга ҳозиргача Far Flung Invest, First Development Group (FDG), Murad Buildings, Nazarov Rakhimbayev Group (NRG), Perspective Building (Novastroy), Power Construction Planet (Discover Invest) каби қурилиш-пудрат компаниялари аъзо бўлиб кирган. Таъкидланишича, ассоциацияга кириш ихтиёрий.
Ўзбекистон қурилиш-пудрат ташкилотлари ассоциацияси қурилиш соҳасини ривожлантиришда давлат органларига ҳар томонлама кўмак кўрсатиш, соҳага доир қонунчиликни такомиллаштириш бўйича таклифлар тайёрлаш, илғор халқаро тажрибани ўрганиш, замонавий технологиялар ва инновацион ғояларни жорий этиш ниятида.
Шунингдек, ассоциация унга аъзо бўлиб кирган қурилиш-пудрат ташкилотларининг ҳуқуқларини ва қонуний манфаатларини ҳимоя қилишни ҳам мақсад қилган. Бундан ташқари, қурилиш соҳасидаги мутахассисларнинг малакасини ошириш ва тажриба алмашиш мақсадида ўқув ва бизнес-тадбирлар ўтказиш
«Қурилиш соҳасининг жадал ривожланиб бориши ва қонуний ўзгаришлар шуни кўрсатадики, бизга қурилиш жараёнларининг шаффофлигини оширадиган, қурилиш-пудрат ташкилотларини бирлаштирадиган, ҳукумат ва кўчмас мулк харидорлари билан икки томонлама ҳамкорликни йўлга қўядиган профессионал ташкилот даркор. Биз ушбу ташкилот давлат ва қурилиш-пудрат компаниялари ўртасида мустаҳкам боғловчи бўғинга айланишига умид қиламиз», - дейди ассоциация раиси Мансуржон Ниёзмуҳаммедов.
Маълумот учун, Қурилиш тармоғини модернизация қилиш, жадал ва инновацион ривожлантиришнинг 2021—2025 йилларга мўлжалланган стратегиясида Ўзбекистонда меъморчилик ва қурилиш соҳасидаги нодавлат нотижорат ташкилотлар аҳамиятини ошириш зарурлиги алоҳида кўрсатиб ўтилган.
Аввалроқ, 2020 йил январида Murad Buildings компанияси раҳбари Мурод Назаров «Дарё»га берган интервьюсида Ўзбекистонда уй-жой қурувчи ташкилотлар ассоциациясини тузиш мақсад қилинганини айтиб ўтган эди.
Изоҳ (0)