Texnopark компанияси электрон сув ҳисоблагичларни ишлаб чиқаришни йўлга қўйиши мумкин. Лойиҳа 25 январь куни Ўзбекистон Президентига тақдимоти ўтказилган саноат ва логистика соҳасидаги инвестицион лойиҳалар рўйхатидан ўрин олган. Бу ҳақда «Махсус ракурс» кўрсатувига таяниб, «Gazeta.uz» хабар берди.
Сув ҳисоблагичларини ишлаб чиқаришга мўлжалланган лойиҳа 77,7 миллиард сўмга баҳоланмоқда. Ушбу маблағларнинг 27,19 миллиард сўмини Texnopark ажратиш ниятида, қолган 50,51 миллиард сўмни эса халқаро молия институтларининг кредит линиялари орқали жалб этиш режалаштирилган.
Лойиҳани амалга ошириш ишлари апрелдан бошланиши ва 10 ой давом этиши мумкин.
Таъсисчиси Тошкент шаҳар ҳокимлиги бўлган Texnopark ҳозирда қатор саноат лойиҳаларини амалга ошириш билан шуғулланиб келмоқда. 2020 йил бошидан буён компания «ақлли» газ ҳисоблагичларни Osten товар белгиси остида ишлаб чиқаряпти. Лойиҳага кўра, 2021 йилнинг июлига қадар 5,28 триллион сўмлик газ 3,54 миллион дона электрон газ ҳисоблагичларни етказиб беришни назарда тутади.
«Интеллектуал мулк» ахборот-қидирув тизими маълумотларига кўра, Osten товар белгисини рўйхатдан ўтказиш учун Artel Engineering and Management ва J-United Group (ягона таъсисчиси — Жаҳонгир Ортиқхўжаев) компаниялари ариза берган.
Шунингдек, Texnopark кир ювиш машиналари, фурнитура ва анжомлар, саноат кондиционерлари ва совутиш тизимлари, электр сув насослари, сув иситгичлари, маиший музлатгичлар, лифтлар, эскалаторлар ва бошқа маҳсулотларни ишлаб чиқаради.
Эслатиб ўтамиз, Монополияга қарши курашиш қўмитаси лифт хизматларини амалга ошириш имтиёзини фақат Texnopark корхонасига берилишига қарши чиққанди.
Изоҳ (0)