2020 йилда деҳқончилик билан шуғулланиш учун ер сўраб, мурожаат қилган 14 минг нафар ёшнинг атиги 3 минг нафарига ер берилган. Бу ҳақда 27 январь, чоршанба куни Президент Шавкат Мирзиёев раислигида ўтказилган йиғилишда маълум қилинди, дея хабар бермоқда «Дарё» мухбири.
Давлат раҳбарининг таъкидлашича, 2020 йили Жиззах вилоятида 5 минг нафар, Хоразмда 2,5 минг, Қашқадарёда 2 минг, Сирдарёда минг нафар йигит-қиз деҳқончилик учун ер ажратишни сўраб мурожаат қилган.
«Шу сабабли Шуҳрат Ғаниев ва Актам Хайитов вилоят ҳокимлари билан бирга жорий йилда 10 сотихдан 1 гектаргача ер ажратиш орқали 10 минг нафар, иссиқхона қуриш, лимончилик, паррандачилик, қуёнчилик, асаларичилик учун кредит бериш ҳисобидан 8 минг нафар, захира ерларини оборотга киритиш учун қудуқ қазиб бериш орқали минг нафар, ғалладан бўшаган ерларда такрорий экин экиш орқали 20 минг нафар ёшларнинг бандлиги таъминланади.
Шунингдек, ‘Туронбанк’ томонидан лимончиликни ривожлантиришга 50 миллиард сўм йўналтирилиб, 4 минг нафар ёш бандлиги таъминланиши лозим», — деди Шавкат Мирзиёев.
Йиғилишда Сирдарё ҳокими Ғофуржон Мирзаевнинг таъкидлашича, ҳозирда вилоятда 2684 та фермер хўжалиги мавжуд бўлиб, улар ўртача 80 гектардан ер майдонига эга.
Президент бу маълумотдан сўнг Мирзаевга 2021 йилнинг ўзида ҳар бир фермер 2 гектардан ерини 4 нафар ёшга бўлиб бериши кераклигини айтди.
«Ҳар бир фермер 2 гектардан ерини ярим гектардан қилиб, 4 нафар ёшга бўлиб берсин. Улар бу ерга истаган экинини эксин, ҳеч ким аралашмайди. Шунча еримиз бўла туриб, одамларимиз четда иш излаб юрибди. Бу тизим ҳамма вилоятда жорий қилинади. Шу орқали камида 10 мингдан ортиқ ёшнинг бандилини таъминлаган бўламиз», — деди давлат раҳбари.
Мавзуга доир:
- Шавкат Мирзиёев таниқли ва муваффақиятга эришган спортчиларни мактабларга бириктириш бўйича топшириқ берди
- Шавкат Мирзиёев: «‘Ёшлар дафтари’га кирган 100 минг нафар йигит-қиз ҳафталик ўқув курсларида ўқитилади»
- Шавкат Мирзиёев Ўзбекистондаги 18-30 ёшлилар орасидаги расмий ишсизлар сонини маълум қилди
Изоҳ (0)