Ўзбекистон 2020 йилда автомобиллар экспортини пул кўринишида 30,4 фоизга оширди, деб хабар бермоқда «Gazeta.uz» Давлат статистика қўмитаси ҳисоботига таяниб. Ушбу давр ичида автомобиллар импорти экспортга нисбатан 2,3 бараварга кўп бўлган.
Январь—декабрь ойларида маҳаллий корхоналар 208,7 миллион долларлик автомобиль экспорт қилган. Импорт ҳажми 475,1 миллион долларни ташкил этиб, 2019 йилга нисбатан 7,9 фоизга ошган (2019 йилда 37,9 фоизга ўсиш кузатилган).
Давлат статистика қўмитаси маълумотларига кўра, 2020 йилда мамлакатда 280 мингдан ортиқ автомобиль ишлаб чиқарилган бўлиб, бу 2019 йилга нисбатан 3,3 фоизга кўп.
UzAuto Motors енгил автомобиллар ишлаб чиқаришни 2019 йилдаги 271,1 мингдан 280 мингдан ортиққа ошириб, рекорд даражада автомобиль ишлаб чиқарилганлигини қайд этди. 12 ой давомида 79 908 та Cobalt (+42,2 фоиз, энг машҳур модель), 66 402 — Nexia (-9,2 фоиз), 50 052 — Gentra (+12,5 фоиз), 51692 — Damas (-0,2 фоиз), 23 003 — Spark (-5,1 фоиз) ва 9023 — Лабо (+23,8 фоиз) ишлаб чиқарилган.
Шу билан бирга, юк машиналари ишлаб чиқариш 5320 дан 4163 гача (21,7 фоизга), автобуслар — 1534 дан 642 гача (58,1 фоизга) камайган.
Аввалроқ Ўзбекистондаги бир нечта компаниялар 2021−2023 йилларда автомобиллар, пикаплар, юк машиналари, микроавтобуслар ва бошқа автомобилларни ишлаб чиқариш ва йиғишни йўлга қўймоқчи эканлиги ҳақида хабар берилган эди.
Президент йилига 50—60 минг дона ҳамёнбоп автомобиллар ва электромобиллар ишлаб чиқаришни йўлга қўйиб, автомобиль саноати учун сармоя киритиш зарурлигини таъкидлаган эди.
Изоҳ (0)