O‘zbekiston 2020-yilda avtomobillar eksportini pul ko‘rinishida 30,4 foizga oshirdi, deb xabar bermoqda “Gazeta.uz” Davlat statistika qo‘mitasi hisobotiga tayanib. Ushbu davr ichida avtomobillar importi eksportga nisbatan 2,3 baravarga ko‘p bo‘lgan.
Yanvar—dekabr oylarida mahalliy korxonalar 208,7 million dollarlik avtomobil eksport qilgan. Import hajmi 475,1 million dollarni tashkil etib, 2019-yilga nisbatan 7,9 foizga oshgan (2019-yilda 37,9 foizga o‘sish kuzatilgan).
Davlat statistika qo‘mitasi ma’lumotlariga ko‘ra, 2020-yilda mamlakatda 280 mingdan ortiq avtomobil ishlab chiqarilgan bo‘lib, bu 2019-yilga nisbatan 3,3 foizga ko‘p.
UzAuto Motors yengil avtomobillar ishlab chiqarishni 2019-yildagi 271,1 mingdan 280 mingdan ortiqqa oshirib, rekord darajada avtomobil ishlab chiqarilganligini qayd etdi. 12 oy davomida 79 908 ta Cobalt (+42,2 foiz, eng mashhur model), 66 402 — Nexia (-9,2 foiz), 50 052 — Gentra (+12,5 foiz), 51692 — Damas (-0,2 foiz), 23 003 — Spark (-5,1 foiz) va 9023 — Labo (+23,8 foiz) ishlab chiqarilgan.
Shu bilan birga, yuk mashinalari ishlab chiqarish 5320 dan 4163 gacha (21,7 foizga), avtobuslar — 1534 dan 642 gacha (58,1 foizga) kamaygan.
Avvalroq O‘zbekistondagi bir nechta kompaniyalar 2021−2023 yillarda avtomobillar, pikaplar, yuk mashinalari, mikroavtobuslar va boshqa avtomobillarni ishlab chiqarish va yig‘ishni yo‘lga qo‘ymoqchi ekanligi haqida xabar berilgan edi.
Prezident yiliga 50—60 ming dona hamyonbop avtomobillar va elektromobillar ishlab chiqarishni yo‘lga qo‘yib, avtomobil sanoati uchun sarmoya kiritish zarurligini ta’kidlagan edi.
Izoh (0)