Санъатдан кетганини айтган Жаҳонгир Отажонов навбатдаги президентлик сайловида ўз номзодини қўйишини маълум қилиши ижтимоий тармоқларда сўнгги ўн кунликдаги энг кўп муҳокама қилинаётган ҳолатлардан бири бўлди. Хонанданинг ушбу қарорига ижтимоий тармоқлар фойдаланувчилари турли муносабат билдирди. Кимдир ундан сиёсатчи чиқмаслигини айтиб, уни бу фикридан қайтаришга уринди, яна кимдир уни қўллаб-қувватлади. Изоҳлар орасида хонанданинг шаънига ҳақоратли сўзлар ёзиб қолдирилган ҳолатлар ҳам учради. Жаҳонгир Отажонов хейтерларига бир неча марта мурожаатлар йўллаб, президент бўлиш осон иш эмаслигини тушунтиришга уринди.
Бироздан сўнг эса Жаҳонгир Отажонов Ўзбекистон Президентига мурожаат қилиб, Ўзбекистондаги энг қолоқ туман ҳокимлигини сўради. Собиқ хонанда давлат раҳбари бўлишни орзу қилиши ҳақидаги гаплари жиддийлигини исботлаш мақсадида сиёсий партия ҳам тузишга ҳаракат қилмоқда. Отажоновнинг ушбу саъй-ҳаракатлари унинг собиқ ҳамкасблари томонидан турлича қабул қилинмоқда. Масалан, «Уммон» гуруҳининг собиқ хонандаси Шоҳрух Жаҳонгир Отажоновга мурожаат қилиб, уни Юнусобод тумани ҳокими ёрдамчиси лавозимига ишга жойлаб қўйишни сўради ҳамда тумандаги йўлларнинг абгор ҳолатини видеога олиб кўрсатди.
Ўзбекистон халқ артисти Юлдуз Усмонова эса Жаҳонгир Отажоновга шунчаки раҳми келишини айтди.
«Ўзининг касбини қила олмаган одам, ўзининг оиласини йўлга қўя олмаган одам президент бўларкан. Кулгилида, бундай одамларга раҳмим келади. Ўзингдан бошла президентликни, аввал ўзингга президент бўлиб ол. Ёлғонсиз чиқ. Бугун ади дейсан, эртага бади дейсан, ‘оғзим бор экан’, деб», — дейди Юлдуз Усмонова.
«Дизайн» кулги жамоаси вакиллари ҳам Жаҳонгир Отажоновнинг ушбу ҳаракатларига юмор ҳисси билан муносабат билдирди.
Аввалроқ режиссёр ва актёр Аҳад Қайюм ушбу ҳаракатлари учун Жаҳонгир Отажоновни «қизиқчи» деб атаган эди.
Мавзуга доир: Фото: Давлат раҳбарига айланган актёрлар
Изоҳ (0)