Yevroittifoq COVID-19’ga qarshi vaksinaning Buyuk Britaniyaga eksport qilinishini to‘xtatib qo‘yishi mumkin. Bu haqda The Independent gazetasi Yevrokengash rahbari Sharl Mishelning Avstriya, Chexiya, Daniya va Gretsiya yetakchilariga yo‘llangan xatiga tayanib xabar berdi, deb yozadi “RBK”.
Nashr qo‘liga kelib tushgan xatda aytilishicha, bunday chora ko‘zda tutilishiga AstraZeneca Britaniya-Shvetsiya farmatsevtik kompaniyasi keltirib chiqargan “vaksina urushi” sabab bo‘lgan. U Yevroittifoqqa vaksina yetkazib berish muddatini kechiktirdi, ammo ayni vaqtda dorining bir qismi ishlab chiqarilayotgan Britaniyani vaksina bilan ta’minlashda davom etmoqda. Kompaniyaning o‘zi buni Bryussel bilan shartnoma London bilan bitimdan keyin imzolangani bilan izohladi.
Mishelning xatida qayd etilishicha, Bryussel shoshilinch choralarni ko‘rib chiqmoqda, ular orasida Pfizer va BioNTech kompaniyalarining Yevroittifoq mamlakatlarida ishlab chiqariladigan vaksinasi eksportini to‘xtatib qo‘yish rejasi ham bor. Buyuk Britaniya 40 million doza dori buyurtma qilgan. Tegishli taklifni Mishel Yevrokomissiya rahbari Ursula fon der Lyayyenga yo‘naltirgan.
Yevrokengash rahbari AstraZeneca bilan ziddiyat muzokaralar yo‘li bilan hal qilinishiga umid bildirdi. “Ammo qoniqarli yechim topilmasa, biz barcha variantlarni o‘rganib chiqib, barcha qonuniy vositalarni va majburlash choralarini qo‘llashimiz kerak, deb o‘ylayman”, — degan u xatida.
Yevrokomissiyaning sog‘liqni saqlash bo‘yicha a’zosi Stella Kiriakidis AstraZeneca kompaniyasiga COVID-19 vaksinasini yetkazib berish jarayoniga o‘zgartirish kiritgani uchun aniqlik kiritishni so‘rab xat yubordi. Ta’kidlanishicha, kompaniya Yevropa Ittifoqiga dastlab kelishilganidan ancha kam dozalarni yuborgan. Uning so‘zlariga ko‘ra, ilgari Yevropa Ittifoqi ushbu kompaniya vaksinani yaratishi va uni ishlab chiqarishini moliyalashtirib, ularni tez yetkazib berish uchun oldindan buyurtmalar bergan. Endi rasmiy Bryussel “shartnomaning to‘liq bajarilishini” xohlamoqda. Stellaning so‘zlariga ko‘ra, “kelgusida Yevropa Ittifoqida COVID-19 vaksinalarini ishlab chiqaradigan barcha kompaniyalar o‘z vaksinalarini eksport qilmoqchi bo‘lsa, bu to‘g‘risida oldindan xabar berishlari shart”.
Yevropa dori-darmon agentligi (EMA) ushbu haftaning oxiriga qadar AstraZeneca vaksinasini tasdiqlashi kerak edi.
Yevropa Ittifoqi, ilgari imzolangan kelishuvga muvofiq, 2021-yilning birinchi choragida 100 million dozada vaksina olishi kerak. Ammo Ittifoq ishlab chiqarish masalalari sababli buyurtmaning yarmini oladi degan qo‘rquv bor.
Izoh (0)